ცაგერში ორმა პოლიციელმა ერთმანეთი მოკლა. ინფორმაცია მომხდარის შესახებ რეგინფომ გაავრცელა.

გამოცემა წერს, რომ პოლიციელები ლაჯანაში მდებარე იუსტიციის სახლის საზოგადოებრივ ცენტრს იცავდნენ, როცა მათ შორის ჩხუბი მოხდა, რის შემდეგაც ცეცხლსასროლი იარაღიდან, სავარაუდოდ, ერთმანეთს ესროლეს.

On.ge-ს წყაროს ინფორმაციით, ერთი პირი მათი გაშველებისას დაშავდა. ის ბარძაყშია დაჭრილი და საავადმყოფოშია გადაყვანილი.

შინაგან საქმეთა სამინისტროში On.ge-ს განუცხადეს, რომ საქმეს პროკურატურა იძიებს. პროკურატურაში მხოლოდ იმას ამბობენ, რომ მომხდარზე გამოძიება სისხლის სამართლის კოდექსის 108-ე, განზრახ მკვლელობის მუხლით დაიწყო. უწყებაში არ პასუხობენ კითხვას ვინ არიან ინციდენტში მონაწილე პირები, რამდენი ადამიანია გარდაცვლილი ან დაშავებული, თუმცა ადასტურებენ, რომ მათ საქმე ინციდენტში პოლიციელების მონაწილეობის გამო გადაეცათ.