ფაქტების გადამოწმების პორტალი, მითების დეტექტორი სახელისუფლებლო "ბლოგერის", გიორგი აღაპიშვილის შესახებ სტატიას აქვეყნებს. სტატია ახალ პრეცედენტზე, სამთავრობო გვერდის მიერ ხელოვნური ინტელექტის მიერ გენერირებული ფოტოს გამოყენებაზე მოგვითხრობს. აქამდე ყალბი გვერდები და პროფილები უმეტესად რეალური ადამიანების ფოტოებს იყენებდნენ.

Facebook გვერდი “გიორგი აღაპიშვილის ბლოგი”, რომელიც 2019 წლის 22 ივლისიდან ფუნქციონირებს, პრო-სახელისუფლებო გვერდია და ხელისუფლების მიმართ კრიტიკულად განწყობილი აქტივისტებისა თუ პოლიტიკური ოპოზიციის წინააღმდეგ მადისკრედიტირებელ პოსტებს ავრცელებს. აღაპიშვილის ბლოგს ქართული ონლაინ პლატფორმები ხშირად წყაროდ იყენებენ და მასზე დაყრდნობით სასურველ გზავნილებს სხვა გვერდებზე თუ საიტებზე ავრცელებენ.

"გიორგი აღაპიშვილის ბლოგის" პროფილის ფოტოზე გამოსახული ადამიანი საერთოდ არ არსებობს. ფოტოს დეტალების ანალიზი და გენერირებული ფოტოების დამახასიათებელი ნიშნები გვიჩვენებს, რომ ფოტო პროგრამულად არის შექმნილი.

ხელოვნურობის დამადასტურებელი ნიშნებია კანთან შერეული თმა, არაბუნებრივი ღრმულები, ასიმეტრია ტუჩებთან და ასე შემდეგ...

ფეისბუკ გვერდი “გიორგი აღაპიშვილის ბლოგი” 2019 წლის 22 ივლისს, “გავრილოვის ღამიდან” 1 თვის თავზე შეიქმნა და მას 3 ადმინისტრატორი ჰყავს. პირველი პოსტი გვერდმა შექმნიდან მეორე დღეს, 23 ივლისს გამოაქვეყნა და ის ლევან ბერძენიშვილის დისკრედიტაციას ისახავდა მიზნად. მისი სამიზნე იყო ასევე მამუკა ხაზარაძე და ანაკლიის პორტის პროექტი.

დისკრედიტაციის გარდა, აღაპიშვილის ბლოგზე ვხვდებით ხელისუფლების, კერძოდ კი გიორგი გახარიასა და ბიძინა ივანიშვილის საქებარ პოსტებს.

ადამიანების დიდმა ნაწილმა კვლავ არ იცის, რომ ხელოვნური ინტელექტის მეშვეობით არარსებული ადამიანების გენერირება ახლა ისეთი მარტივია, როგორც არასდროს. მაგალითად, ამ საიტზე განთავსებული არც ერთი ადამიანი არ არსებობს.

ზემოთ მოცემულ ფოტოზე ხედავთ იმ ოთხწლიან პროგრესს, რომელიც ხელოვნურმა ინტელექტმა გაიარა. ფოტოს მარცხენა მხარეს არსებული შავ-თეთრი ფოტოები ხელოვნური ინტელექტის მიერ 2014 წელს არის შექმნილი. ფოტოში მარჯვნივ კი ამ წელს გამოქვეყნებულ სურათებს ვხედავთ.

თუ გინდათ, გადაამოწმოთ, რამდენად კარგად არჩევთ ერთმანეთისგან ნამდვილ და "გამოგონილ" ადამიანებს, შეავსეთ ჩვენი ტესტი.

ასევე იხილეთ: