ხვალ, 22 ნოემბერს ექვსი გრემის მფლობელი ბრიტანული როკ ბენდი ქოლდფლეი ფანების 4-წლიან მოლოდინს დაასრულებს და ახალ ალბომს გამოუშვებს. თუმცა, მზად იყავით, რომ რაღაც პერიოდი ახალი მუსიკის მოსმენას მხოლოდ მოწყობილობების საშუალებით შეძლებთ.

კრის მარტინმა BBC-სთან თქვა, რომ ის ახალი ალბომის ტურნეს გამართვას არ აპირებს, იქამდე, სანამ მისი კონცერტები გარემოს და ეკოლოგიას სარგებელს არ მოუტანს:

"ეს ალბომი ტურნეზე ჯერ არ მიგვაქვს, შეიძლება ამან ერთი ან ორი წელი წაიღოს. მხოლოდ მაშინ გავმართავთ კონცერტებს, როდესაც ის სასარგებლო იქნება".

მარტინი დასძენს, რომ ქოლდფლეის სურს, მომავალზე დადებითი გავლენა იქონიოს.

მერვე სტუდიური ალბომი, სახელად Everyday Life ორად იქნება გაყოფილი. ერთს ერქმევა Sunrise (მზის ამოსვლა), ხოლო მეორეს — Sunset (მზის ჩასვლა).

მუსიკალური ჯგუფი ახლა იორდანიაში იმყოფება, სადაც კონცერტს გამართავს, რომელიც პირდაპირ ეთერში იუთუბზე გავა. ალბომის შინაარსიდან გამომდინარე, კონცერტები დედაქალაქ ამანში მზის ამოსვლისას და მზის ჩასვლისას გაიმართება.