ინოვაციებისა და ტექნოლოგიების სააგენტოს ინფორმაციით, ტელეკომუნიკაციების საერთაშორისო კავშირი (ITU) საქართველოს ინტერნეტიზაციის პროექტში მიიღებს მონაწილეობას.

ორგანიზაცია ათამდე სოფელში ოპტიკურ-ბოჭკოვან ხაზს მიიყვანს, შემდეგ დაშვების ცენტრებს შექმნის და ტრენერების გადამზადებაში დაეხმარება.

პროექტის ფარგლებში საქართველოს ITU-ს რეგიონალური ოფისის ხელმძღვანელი ოროზობეკ კაიკოვი სტუმრობს.

აღნიშნული ინიციატივის ხარჯებს მთლიანად ტელეკომუნიკაციების საერთაშორისო კავშირი დაფარავს.

ITU საქართველოს ინოვაციებისა და ტექნოლოგიების სააგენტოსთან თანამშრომლობით საქართველოში სპეციალური ინოვაციების ცენტრების ფორმირებასაც გეგმავს. ცენტრები განკუთვნილი და მორგებული იქნება შეზღუდული შესაძლებლობების მქონე პირებისათვის.

სააგენტოს ცნობით, შშმ პირები გაეცნობიან ახალ ტექნოლოგიებს და ექნებათ წვდომა ადაპტირებულ ტექნიკასთან.

ტელეკომუნიკაციების საერთაშორისო კავშირი არის ის ორგანიზაცია, სადაც ხდება საერთაშორისო სტანდარტებზე მუშაობა, რაც შემდგომ მთელ მსოფლიოში ინერგება.