გუშინ, 18 ნოემბერს პარლამენტთან მიმდინარე აქციის დაშლისას დაკავებული პირები დღვანდელ აქციაზე ვერ მივლენ. აქცია პარლამენტთან 19 საათზეა დანიშნული სასამართლომ კი საქმის განხილვა ისევ გადადო.

როგორც On.ge-ს ჟურნალისტი ადგილიდან იუწყება მოსამართლის ეს გადაწყვეტილება აქტივისტებმა დარბაზშივე გააპროტესტეს. "მონავ", "სირცხვილია" — ისმოდა დარბაზში.

დღეს განიხილებოდა აქტივისტების ბექა ბასიალაიას, ზუკა ბერძენიშვილის, გიორგი ბუნტურის, ლუკა ჭიჭინაძის, გურამ მჭედლიშვილის და აჭარის უმაღლესი საბჭოს წევრის, ელგუჯა ბაგრატიონის საქმეები.

სხდომაზე ადვოკატმა გიორგი ონიანმა მოსამართლის აცილების შუამდგომლობა დააყენა, რაც მოსამართლემ არ დააკმაყოფილა. მოსამართლემ მიიჩნია, რომ ავტორმა ვერ დაასაბუთა რატომ არის საჭირო აცილება.

ზუკა ბერძენიშვილმა სხდომაზე აღნიშნა, რომ სხეულზე აქვს რამდენუმე მსუბუქი დაზიანება. ხოლო ლუკა ჭიჭინაძემ გაცხადა, რომ დაკავების პროცესში ძალის გადამეტებას ჰქონდა ადგილი. იგივე აღნიშნა გიორგი ბუნტურმაც. მისი თქმით, პოლიციელები წვივებში ურტყამდნენ ფეხებს.

მანამდე, 11:30 საათზე გასამართი სხდომა 15 საათზე დაიწყო. მოსამართლე აქციის დაშლისას დაკავებული კიდევ ექვსი პირის, #სირცხვილიას აქტივისტის, გიგა მაქარაშვილის, საკრებულოს დეპუტატის, ირაკლი ნადირაძისა და კიდევ ოთხი პირის ადმინისტრაციული საქმე უნდა განეხილა, თუმცა პროცესი ორი საათით გადადო. ეს სხდომა 17 საათზე უნდა განახლებული, თუმცა ამ დრომდე არ დაწყებულა. სავარაუდოდ, ვერც ეს პირები მოახერხებენ აქციაზე დასწრებას.

პარლამენტის პიკეტირების დაშლის დროს ჯამში 37 პირი დააკავეს. დაკავებულებიდან ნაწილს ხულიგნობას ედავებიან, ნაწილის კი სამართალდამცავების მოთხოვნის დაუმორჩილებლობას. დაშლის დროს დაშავდა აქციის 4 მონაწილე და 2 სამართალდამცველი.