მმართველი პარტიის გენერალური მდივნის, კახა კალაძის თქმით, სწორედ ქართული ოცნება ჩაიწერება საქართველოს პოლიტიკურ ისტორიაში "პროპორციულ საარჩევნო სისტემაზე გადასვლის ერთადერთ ინიციატორად და ავტორად".

დღეს, 18 ნოემბრის ბრიფინგზე კალაძემ გაერთიანებული ოპოზიციის აქციის ორგანიზება ნაციონალურ მოძრაობას დააბრალა და თქვა, რომ გასულ წლებში წინა ხელისუფლებას საარჩევნო სისტემის ცვლილების ინიციატივა არ ჰქონია.

კალაძის თქმით, ქართულმა ოცნებამ ირაკლი კობახიძის ხელმძღვანელობით მოახერხა 2024 წლიდან პროპორციული საარჩევნო სისტემაზე გადასვლა:

"ეს იყო ის მაქსიმუმი, ის რთული შიდაპარტიული კონსენსუსი, რომლის მიღწევა დიდი ძალისხმევის ფასად იქნა მიღწეული".

კალაძემ გააკრიტიკა დავით უსუფაშვილიც, რომელიც მათი ხელისუფლების დროს პარლამენტის თავმჯდომარე იყო:

"2012-2016 წლებში სახელმწიფო საკონსტიტუციო კომისიას ხელმძღვანელობდა გუშინდელი საპროტესტო აქციის კიდევ ერთი მონაწილე, დავით უსუფაშვილი, რომელსაც 4 წლის მანძილზე თითი თითზე არ დაუკარებია საკონსტიტუციო რეფორმის განსახორციელებლად".

პარლამენტის შენობა ბლოკირებულია. აქციის მონაწილეები ამბობენ, რომ არ შეუშვებენ არც ერთ დეპუტატს. შესასვლელებში გაიშალა კარვები და დააწყვეს ქვიშის ტომრები, ევროპულმა საქართველომ ყველა შესასვლელ ჭიშკარს სიმბოლურად ბოქლომი დაადო.

აქცია თბილისის ქუჩებში მას შემდეგ იმართება, რაც ბიძინა ივანიშვილის დაპირება არ შესრულდა. მმართველმა პარტიამ ჩააგდო საკონსტიტუციო ცვლილებების პროექტი, რომლითაც ქვეყანაში 2020 წლის არჩევნები სრულად პროპორციული წესით უნდა ჩატარებულიყო. მმართველი პარტიის ამ გადაწყვეტილებამ ოპოზიციური პარტიები საერთო მოთხოვნის ირგვლივ გააერთიანა. მოთხოვნას იზიარებენ სამოქალაქო სექტორის წარმომადგენლები და მოძრაობა #სირცხვილია.