ვანო მერაბიშვილის ადვიოკატი ოთო კახიძე ფეისბუკის საკუთარ გვერდზე თეა წულუკიანის ბრიფინგს ეხმიანება იმის შესახებ, რომ სტრასბურგის სასამართლომ დააკმაყოფილა იუსტიციის სასამართლოს საჩივარი.

კახიძე უარყოფს სამინისტროს მიერ გავრცელებულ განცხადებას და ამბობს, რომ ევროსასამართლომ საჩივარი მხოლოდ განსახილველად მიიღო და არ დაუკმაყოფილებია:

"შეგახსენებთ, რომ ივანიშვილის ხელისუფლებას ჩვენ მოვუგეთ ექსტრადირების ყველა პროცესი, ინტერპოლის ყველა დავა და ვანო მერაბიშვილის საქმე სტრასბურგის სასამართლოში. ანალოგიურად დავამარცხებთ დიდ პალატაშიც, რომლის გადაყვეტილებასაც კიდევ უფრო მაღალი ლეგიტიმაცია ექნება".

საქართველოს იუსტიციის სამინისტრო აცხადებს, რომ 2016 წლის 17 ოქტომბერს, ადამიანის უფლებათა ევროპული სასამართლოს 5 მოსამართლისგან შემდგარმა კოლეგიამ დააკმაყოფილა საქართველოს მთავრობის მოთხოვნა. მათი განცხადებით, სასამართლომ წარმოებაში მიიღო საჩივარი, რომლითაც იუსტიციის სამინისტრომ ვანო მერაბიშვილის საქმეზე ამავე სასამართლოს ერთ-ერთი პალატის მიერ 2016 წლის 14 ივნისს გამოტანილი გადაწყვეტილება გაასაჩივრა.

იუსტიციის სამინისტროს განცხადებით, 14 ივნისს გამოტანილი გადაწყვეტილება, ჯერჯერობით, არ შედის ძალაში და არ მიექცევა აღსასრულებლად.

მიღებული გადაწყვეტილების თანახმად, მერაბიშვილის განაცხადი განსახილველად გადაეცა სასამართლოს დიდ პალატას 17 მოსამართლის შემადგენლობით, რომლის წინაშეც საქმის განხილვა დაიწყება თავიდან და საბოლოო გადაწყვეტილებას სწორედ ისინი მიიღებენ.