ქართული ოცნების დეპუტატს ნინო წილოსანს თავის მაჟორიტარულ ოლქში ამომრჩევლები პროტესტით დახვდნენ. მოქალაქეებმა დეპუტატს ჰკითხეს შერცხვა თუ არა გურულების, როცა პროპორციულ საარჩევნო სისტემას მხარი არ დაუჭირა. შეხვედრის კადრები გურია თუდეიმ გაავრცელა.

"20 ივნისს გავრილოვის ღამე როცა მოაწყვეს, აი, ამის შემდეგ დაპირდით ხალხს, დასავლეთი გადააგდეთ, გადააგდეთ ქართველი ხალხი. ამის შემდეგ კიდევ სხვა გგონიათ თავხედი, ჩვეულებრივი მატყუარა ხართ ისევე, როგორც ბიძინა ივანიშვილი, მისი დავალების შემსრულებელი ხართ", — თქვა აქციის ერთ-ერთმა მონაწილემ.

ნინო წილოსანმა დღეს, 15 ნოემბერს განმარტა, რატომ არ დაუჭირა მხარი პროპორციული საარჩევნო სისტემის შემოღება საქართველოში. მისი თქმით, პროპორციული სისტემა ევროპის ქვეყნებში ქმნის პოლიტიკურ კრიზისს და ეს ქვეყანას სერიოზულად დააზიანებს. განცხადებაში მან ასევე აღნიშნა, რომ მისი ამომრჩევლების პროლემების მოგვარებაში დიდი წვლილი აქვს შეტანილი. სოციალურ ქსელში გამოქვეყნებული განცხადების შემდეგ, ნინო წილოსანმა ლაივში ისაუბრა, რომ გურიაში ამომრჩევლებს შეხვდებოდა.

პარლამენტმა საკონსტიტუციო ცვლილებები ჩააგდო და 2020 წელს არჩევნები პროპორციული სისტემით აღარ გაიმართება. წილოსანი ერთ-ერთია იმ 37 დეპუტატს შორის, რომელმაც კენჭისყრაში მონაწილეობა არ მიიღო, რის გამოც კანონპროექტს ხმები დააკლდა.

ასევე, წილოსანი ერთ-ერთია მათ შორის, ვინც ამ კანოპროექტის ინიციატორი იყო და აზრი შეიცვალა.