დამოუკიდებელი დეპუტატი გედევან ფოფხაძე პარლამენტის წინ მიმდინარე აქციას შეურთდა. მისი თქმით, დიდი სახალხო პრეტესტის შემთხვევაში რუსთაველზე შეკრებილი მოქალაქეები მიიღებენ საქართველოს მომავალზე გადაწყვეტილებას.

"მე მიმაჩნია, რომ თუ მოხდება დიდი სახალხო პროტესტის ორგანიზება, ისეთი ორგანიზაციული სახალხო პროტესტის ფორმის გამონახვა, რომელიც იქნება უფრო ლეგიტიმური, ვიდრე პარლამენტი, პარლამენტზე მეტი ლეგიტიმაცია შეიძლება იყოს აქ, რუსთაველზე. მოვა ქართველი ხალხი თუ ჩვენ აქ ვიქნებით დიდი რაოდენობით, აქ მივიღებთ გადაწყვეტილებებს საქართველოს მომავალთან დაკავშირებით", — თქვა გედევან ფოფხაძემ რუსთავი 2-თან საუბრისას.

პოლიტიკოსმა მოუწოდა ყველას, რომ ამ აქციას შეუერთდნენ. მისი თქმით, ახლა პოლიტიკური განსხვავებების გარკვევის დრო არაა. გედევან ფოფხაძის აზრით, ბიძინა ივანიშვილისა და ქართული ოცნების შემთხვევაში დემოკრატიული არჩევნები ვერ ჩატარდება. მისი თქმით, ამ პროტესტს არ უნდა მიეცეს პარტიული გამოსვლების ხასიათი, რადგან ეს სახალხო პროტესტია.

პროპორციულ სისტემაზე გადასვლის კანონპროექტის ჩაგდების შემდეგ დაწყებულმა საპროტესტო აქციამ რუსთაველის გამზირი გადაკეტა. სამოქალაქო აქტივისტების დაწყებულ პროტესტს ოპოზიციური პარტიებიც შეუერთდნენ.

დღეს, 14 ნოემბერს ბიძინა ივანიშვილის დაპირება არ შესრულდა. ქართულმა ოცნებამ მხარი არ დაუჭირა კანონპროექტს, რომლითაც ქვეყანაში 2020 წლის არჩევნები სრულად პროპორციული სისტემით უნდა ჩატარებულიყო. კანონპროექტის ჩაგდების შემდეგ გადაიკეტა რუსთაველის გამზირი და ჩაინიშნა ოპოზიციური პარტიების საერთო ბრიფინგი.