რესპუბლიკური პარტიის ლიდერი, დავით უსუფაშვილი მიიჩნევს, რომ ბიძინა ივანიშვილმა რესპუბლიკური პარტია "ურჩობისთვის დასაჯა". ამის შესახებ უსუფაშვილმა კვირის პალიტრასთან ინტერვიუში ისაუბრა.

უსუფაშვილის თქმით, დასჯა გამოიხატა იმაში, რომ ქართული ოცნების კანდიდატმა მისმა პირდაპირმა კონკურენტმა საბურთალოს მაჟორიტარულ ოლქში, ლევან გოგიჩაიშვილმა, იმაზე მეტი რესურსი დახარჯა, ვიდრე მმართველი პარტიის სხვა კანდიდატებმა სხვა ოლქებში.

როგორც პარლამენტის ჯერ კიდევ მოქმედი თავმჯდომარე ამბობს, რესპუბლიკური პარტიის რეიტინგი 5%-ის ფარგლებში იყო, თუმცა როგორც გარე ფაქტორებმა, ისე შიდა შეცდომებმა, ამ რეიტინგის კლება გამოიწვია. ერთ-ერთ გარე ფაქტორად, უსუფაშვილი, ჭორების გავრცელებასა და ქართული ოცნების კოორდინატორების მობილიზებას ასახელებს:

"გააქტიურებული იყო ჭორების პროპაგანდაც. დავაფიქსირეთ, რომ არჩევნებამდე ორი ადამიანი ავტობუსში იჯდა და მგზავრების გასაგონად ამბობდა, რესპუბლიკელები ერთნაირსქესიანთა ქორწინების მომხრეები არიანო. ასეთი ადამიანები ავტობუსებით მთელი დღის განმავლობაში მგზავრობდნენ და ჭორებს ავრცელებდნენ".

უსუფაშვილის მოსაზრებით, 2016 წლის 8 ოქტომბრის საპარლამენტო არჩევნები 2012-ის არჩევნებს სჯობდა, თუმცა 2013-ის საპრეზიდენტო არჩევნებთან შედარებით ბევრად უარესი იყო.

ბიძინა ივანიშვილი იყო პირველი, რომელმაც ჯერ კიდევ დავით უსუფაშვილამდე, კონკურენტები, კონკრეტულად კი ნაციონალური მოძრაობა, ხელისუფლების წინააღმდეგ საზოგადოებრივი ტრანსპორტის მგზავრებს შორის ჭორების გავრცელებაში დაადანაშაულა. ის ამბობდა, რომ ენმ-მ სპეციალურად დაიქირავა ჭორების გამავრცელებლები:

"100 ქალი ან უფრო მეტი ჰყავთ დაქირავებული, და ლაპარაკობენ, "დედა, დედა, ქალო გაიგე? გაიგე თურმე ის გარბის, იმას რაღაც სჭირს, არჩევნების მერე ჯანმრთელობის დაზღვევა აღარ იქნება" და ეს სამსახურიც მათ დააფუძნეს".