სულ ცოტა ხანია, რაც დისნეიმ ახალი პლატფორმა Disney+ შექმნა, რომელიც ნეტფლიქსის მსგავსად მაყურებლებს ასეულობით სერიალისა და ფილმის ერთ სივრცეში ნახვის შესაძლებლობას აძლევს. მათ შორისაა ცნობილი ანიმაციური სიტკომი The Simpsons, რომლის ყველა სეზონსა და სერიას დისნეიმ ერთად მოუყარა თავი.

ამ მშვენიერი სიახლის მიუხედავად, სიტკომის ერთგულმა გულშემატკივრებმა მალევე შენიშნეს, რომ სიმპსონებს ერთ-ერთი ყველაზე პოპულარული ეპიზოდი, Stark Raving Dad აკლია. ეს ეპიზოდი 1991 წელს გამოვიდა და მასში მაიკლ ჯექსონიც იღებდა მონაწილეობას - ეს ცნობილი მომღერალი ერთ-ერთ პერსონაჟს ახმოვანებს. როგორც ჩანს, სწორედ ამის გამო დისნეიმ გადაწყვიტა, რომ ეს კონკრეტული სერია თავის სტრიმინგ სერვისიდან ამოეღო.

2019 წელს HBO-მ დოკუმენტური ფილმი Leaving Neverland გადაიღო, რომელმაც მთელს მსოფლიოში დიდი გამოხმაურება გამოიწვია: ორმა კაცმა საჯაროდ აღიარა, რომ ჯექსონი ბავშვობაში მათზე სექსუალურად ძალადობდა. მაშ შემდეგ მისი სიმღერების გაშვება არაერთმა რადიომ შეწყვიტა და მართალია, თავად კომპანიას ოფიციალური განცხადება ჯერ არ გაუვრცელებია, მაგრამ, ალბათ, დისნეის გადაწყვეტილებაც სწორედ ამ ფაქტს უკავშირდება.

ფოტო: Disney

სიმპსონებთან ერთად Disney+ თავის მომხმარებლებს კიდევ უამრავ ანიმაციურ ფილმსა თუ სერიალს სთავაზობს, რომელთა უმეტესობაც თავად დისნეის მიერ წარსულში შექმნილი საყოველთაოდ ცნობილი პროდუქტია. თუმცა, როგორც აღმოჩნდა, გასულ საუკუნეში შექმნილი ანიმაციების ნაწილი სიძულვილის ენის ელემენტებს შეიცავს, რის გამოც კომპანიამ ასეთი შემთხვევების წინ გასაფრთხილებელი ტექსტი დაამატა, რომ კონკრეტული პროგრამა, შესაძლოა, შეიცავდეს "მოძველებულ კულტურულ წარმოდგენებს".

მსგავსი გაფრთხილება შეეხო 1941 წელს გადაღებულ ანიმაციას Dumbo, რომელშიც გამოყენებულია რასისტული განწყობის მქონე სიმღერა. იგივე კატეგორიაში მოხვდა პიტერ პენი და მიკი მაუსიც, თუმცა მომხმარებლების ნაწილს მიაჩნია, რომ უბრალოდ სიტყვიერი გაფრთხილება არ არის საკმარისი, რათა დისნეიმ წარსულში დაშვებული შეცდომები გამოასწოროს.