"სკოლის მოსწავლეებისა და პედაგოგების საყურადღებოდ! ცხოველთა მონიტორინგის სააგენტო, საზოგადოების ცნობიერების ამაღლების კამპანიის ფარგლებში, დედაქალაქის სკოლებში საინფორმაციო-შემეცნებით გაკვეთილებს ატარებს", — წერია ცხოველთა მონიტორინგის სააგენტოს ფეისბუქის საჯარო პოსტში.

ამავე პოსტიდან ვიგებთ, რომ ახალი კამპანიის მიზანია მოზარდებში შინაური ცხოველების მიმართ სიყვარული და ჰუმანურ დამოკიდებულებები გააღვივოს.

ამ მნიშვნელოვანი საგანმანათლებლო პროცესის პარალელურად კი სკოლის მოსწავლეებს შესაძლებლობა ექნებათ კიდევ ერთხელ გაიაზრონ, რას ნიშნავს ცხოველის კეთილდღეობა, რა უფლებები აქვთ მათ და ასევე რა ფსიქოლოგიურ, დადებით ეფექტს ახდენს ცხოველის ყოლა მათზე.

სწავლებასთან ერთად ბავშვები მიუსაფარ ცხოველებთან დაკავშირებულ მოკლემეტრაჟიან ფილმებს ნახავენ და ამავე თემის ირგვლივ არსებული გამოწვევებისა და პრობლემების გადაჭრის გზებზე იმსჯელებენ.

"სოციალური პასუხისმგებლობის წახალისების მიზნით, იმ მოსწავლეებს, რომლებიც ცხოველების კეთილდღეობისათვის სხვადასხვა ღონისძიებას ახორციელებენ, სააგენტო სერტიფიკატებს გადასცემს და ცხოველების მეგობრის სტატუსს მიანიჭებს", — ამბობს ცხოველთა მონიტორინგის სააგენტოს თანამშრომელი ნატა უზუნაშვილი On.ge-სთან საუბრისას.