პარლამენტის ვიცე-სპიკერი და ქართული ოცნების წევრი, თამარ ჩუგოშვილი ამბობს, რომ სწორი იქნება, თუ გამოძიება 8-10 ნოემბრის ძალადობრივი აქციის ორგანიზატორების პასუხისგებაზე ისაუბრებს. ამის შესახებ მან იმედის ეთერში განაცხადა.

"რაც შეეხება ორგანიზატორების როლს, რა თქმა უნდა, მე სამართლებრივ კვალიფიკაციას არ ვახდენ, მაგრამ ჩემი შეფასებით, რაც ზედაპირზე დევს, რასაც საჯაროდ ვუყურებ, აქ ვხედავ ორგანიზატორების პასუხისგების ნიშნებსაც. რა თქმა უნდა, სამართლებრივად ეს გამოძიება უნდა დაადგინოს. მაგრამ აქ ორგანიზატორების პასუხისგებაც რომ გამოიკვეთოს, ეს იქნება სწორი", — თქვა ჩუგოშვილმა იმედის ეთერში.

ბოლო ორი დღეა საქართველოს კინოთეატრებთან ძალადობრივი აქცია იმართება, სადაც ისმის ჰომოფობიური მოსაზრებები. აქცია დღესაც არის დაგეგმილი. ძალადობრივი აქცია ანტილიბერალურმა ჯგუფებმა დაგეგმეს, რომელსაც გურამ ფალავანდიშვილი, დიმიტრი ლორთქიფანიძე და ლევან ვასაძე ხელმძღვანელობენ. მათ ჰგონიათ, რომ And Then We Danced-ის ყურებით ადამიანი სექსუალურ ორიენტაციას შეიცვლის.

ამ აქციების დროს დაშავდა ორი პოლიციელი, დაზიანდა მათი მანქანა და And Then We Danced-ის საყურებლად მისულ ანა სუბელიანს მიღებული დაზიანების გამო თვალის მიმდებარე ადგილზე ქირურგიული ჩარევა დაჭირდა.