საპარლამენტო უმრავლესობის წევრი დავით მათიკაშვილი ეხმაურება ამერიკის საელჩოს განცხადებას და აცხადებს, რომ შეერთებული შტატები საქართველოს უმნიშვნელოვანესი სტრატეგიული პარტნიორია:

"ასეთ სიტუაციებში ზოგადად პროვოკაციული განცხადებების ალბათობა არის მაღალი... ყველა ისეთი მიმართულება, რომელიც სწორედ ასეთი პარტნიორების წინააღმდეგ არის წარმართული, რა თქმა უნდა, პროვოკაციულია და რა თქმა უნდა, ის კარგს მიზნად ნამდვილად არ ისახავს".

საქართველოს კინოთეატრებთან ჰომოფობიური ჯგუფები არიან შეკრებილნი, რომლებიც ქართულ-შვედურ გეი-დრამის, And Then We Danced-ის ქართულ კინოთეატრებში ჩვენებას აპროტესტებენ.

გუშინ ამერიკის საელჩომ ვებგვერდზე გამოაქვეყნა განცხადება და ამერიკის მოქალაქეებს მოუწოდა მოერიდონ იმ ადგილებს, სადაც 8-10 ნოემბერს კინოთეატრებში და ჩვენ ვიცეკვეთ გადის და სავარაუდო ძალადობაა მოსალოდნელი:

"სხვადასხვა ჯგუფები აპროტესტებენ ფილმის, და ჩვენ ვიცეკვეთ პრემიერას ქართულ კინოთეატრებში. ამ ჯგუფების წევრების დიდი ნაწილი, რომლებიც ანტი-ლგბტ რიტორიკით გამოირჩევიან, პრაიდის კვირეულსაც აპროტესტებენ. მათი განცხადებების ნაწილი ანტი-ამერიკულიცაა და ისინი ავრცელებენ ყალბ ინფორმაციას იმაზე, რომ დასავლეთის ხელისუფლებამ გასცა ფილმის ჩვენებაზე ბრძანება".

ამ მომენტისთვის, აგრესიული პირები ფილმის და ჩვენ ვიცეკვეთ სეანსის ჩაშლას ცდილობენ და კინოთეატრ ამირანის სტუმრებს პიროტექნიკასა და სხვადასხვა ნივთებს ესვრიან.