"საპატრიარქოსგან ვითხოვთ, რომ ერთი კვირის თავზე ჰქონდეს საკითხი გამოკვლეული. მე მგონი, ცოტა ზედმეტს ვთხვოთ ამ შემთხვევაში საპატრიარქოს", — აცხადებს საპატრიარქოს საზოგადოებასთან ურთერთობის სამსახურის ხელმძღვანელი მამა ანდრია ჯაღამაიძე მეუფე იაკობის განცხადებების შესახებ. მისი თქმით, საგამოძიებო სტრუქტურებსაც კი წლები სჭირდებათ სხვადასხვა საკითხის გამოსაკვლევად.

"ნუ ვთხოვთ ჩვენ ეკლესიას, რომ მყისიერად ჰქონდეს რეაგირება რაღაც მოვლენაზე, მითუმეტეს, როდესაც ასე რთულია სიტუაცია, ბევრი კომპონენტისგან შედგება და ბევრი საკითხია გასარკვევი", — განაცხადა მან ტელეკომპანია პირველის ეთერში.

ის ვარაუდობს, რომ საპატრიარქო მოგვიანებით მიუბრუნდება მეუფე იაკობის განცხადებების განხილვას. მანამდე მან აღნიშნა, რომ სინოდს ამ საკითხის განხილვის საშუალება არ ჰქონდა და "მაინცდამაინც ძალიან მნიშვნელოვანი" არც არის.

მეუფე იაკობმა 26 ოქტომბერს TV პირველის ეთერში ყოფილ პრემიერ გიორგი კვირიკაშვილის კაბინეტში გამართული შეხვედრა გაიხსენა, სადაც "ეჩალიჩებოდნენ პატრიარქ ილია მეორის გადაყენებაზე და შიო მუჯირის პატრიარქად არჩევაზე". მისი თქმით, შეხვედრას ესწრებოდა სამი ადამიანი: სახელმწიფო უსაფრთხოების სამსახურის მაშინდელი უფროსი ვახტანგ გომელაური, მაშინდელი შინაგან საქმეთა მინისტრი, გიორგი გახარია და გიორგი კვირიკაშვილი.

კითხვაზე, პრემიერთან შეხვედრაზე განიხილებოდა პატრიარქის ტახტიდან ჩამოცილება, თუ მკვლელობა, იაკობმა უპასუხა:

"ყველაზე კარგი ვარიანტი იყო, რომ მოეკლათ... მე მაგას არ დავუშვებ. არც დიმიტრი [შიოლაშვილი], არც პეტრე [ცაავა], არც სხვები, არც ბატონი ბიძინა [ივანიშვილი]... მე შემიძლია გამოვიდე და ყველა მაგათზე ვთქვა, რას აკეთებდნენ, რას აშავებდნენ. ჭკვიანად თუ არ იქნებიან, გადავუვლი თავზე, რომ ჰგონია რომ ქვეყნის ხელმძღვანელია..."

ეპისკოპოს იაკობის თქმით, პრემიერ კვირიკაშვილის ცენტრალურ კაბინეტში გაიმართა ეს შეხვედრა და ამის შესახებ პატრიარქმა ილია მეორემაც იცის. იაკობის მტკიცებით, მას აქვს დოკუმენტები იმაზე, რომ "მეუფე პეტრე და დეკანოზი [გიორგი მამალაძე] ერთად იყვნენ ყველაფერში". სასულიერო პირი ამბობს, რომ "ციანიდის საკითხი" მანამდე, ამ შეხვედრამდე იყო დაგეგმილი, რაშიც "სახელმწიფოც იყო ჩარეული".

მეუფე იაკობის თქმით, მთავრობის წევრებს პირველად თავად შეხვდა, შემდეგ კი მათ შეხვდნენ მეუფე თეოდორე, მეუფე გრიგოლი და მეუფე პეტრე:

"მათ [გიორგი] გახარია და ვახო [გომელაური] შეხვდა. მას [ვახტანგ გომელაურს] ყოველთვის წესიერი პოზიცია ეჭირა. მითხრეს, რომ... პირდაპირ გეტყვით, ვანოს [ჩხარტიშვილის] ის იყო ბიძინასთან... ბიძინამ კიდე ამათ დაავალა. მაგათ ყველას აწი მე მივხედავ. რომელი 2020-ის არჩევნები? ყველას მივხედავ".

მეუფე იაკობის ბრალდებები უარყო პრემიერ-მინისტრმა გიორგი გახარიამ. პროკურატურამ კი დანაშაულის ნიშნები გამორიცხა.

მეუფე იაკობმა დატოვა ქორეპისკოპოსის წოდება და სინოდის სხდომაზე საუბრის ფორმის გამო პატიება ითხოვა. ის ეპარქიის მმართველად დატოვეს.