საქართველოს პრეზიდენტმა, სალომე ზურაბიშვილმა სინოდის დღევანდელი სხდომის შემდეგ პატრიარქ ილია მეორესთან ერთად გადაღებული ფოტო გამოაქვეყნა. ზურაბიშვილს ფოტოზეა არანაირი წარწერა არ გაუკეთებია.

მის ამ პოსტამდე ფეისუბქგვერდზე პატრიარქს მხარდაჭერა გამოუცხადეს როგორც უმრავლესობის, ასევე ოპოზიციის წარმომადგენლებმა.

დღევანდელი სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი". მოგვიანებით მეუფემ განმარტა, რას ნიშნავს სიტყვა "პიდარასტია" და პატრიარქი "ჭაბუკების გახრწნაში" დაადანაშაულა.

სინოდის განცხადებით, მეუფე პეტრეს ცოდვის მოუნანიებლობის გამო შეუჩერეს მღვდელმსახურების უფლება და მონასტერში წასვლისკენ მოუწოდეს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge მის სიტყვებს უცვლელად გთავაზობთ.