"თითოეული ქართველი, თითოეული მოქალაქე დღეს იქნება ჩვენი პატრიარქის გვერდზე", — ასე გამოეხმაურა პრემიერ-მინისტრი, გიორგი გახარია მეუფე პეტრეს განცხადება, რომ პატრიარქი "პიდარასტიისა და მამათმავლობის ცოდვით" იყო შეპყრობილი.

გახარია ამბობს, რომ მსგავსი თავდასხმა პატრიარქზე შეტევაა ქვეყანაზე, სახელმწიფოებრიობასა და ეკლესიაზე:

"ადამიანები, რომლებიც ვერ თოკავენ საკუთარ ეგოს, უდიდესი რისკის ქვეშ აყენებენ ჩვენს დღევანდელობასა და ხვალინდელ დღეს. ეს აბსოლუტურად მიუღებელია. დარწმუნებული ვარ, რომ ასეც იქნება, თითოეული ქართველი, თითოეული მოქალაქე დღეს იქნება ჩვენი პატრიარქის გვერდზე. რა თქმა უნდა, ამასაც მოვერევით და ამასაც გავუძლებთ ჩვენი პატრიარქის ლოცვა-კურთხევით".

დღეს, 31 ოქტომბერს სინოდის სხდომის დასრულების შემდეგ მეუფე პეტრემ განაცხადა, რომ ეკლესიაში მამათმავლობის ცოდვის მხილების გამო ილია მეორემ მღვდელმთავრობიდან გადააყენა. მოგვიანებით კი აღნიშნა, რომ თავად პატრიარქია "პიდარასტიისა და მამათმავლობის ცოდვით შეპყრობილი". მეუფე პეტრემ განმარტა, რომ სიტყვა "პიდარასტიაში" "ჭაბუკის გამხრწნელი" იგულისხმა. მისი თქმით, ეს საეკლესიო ტერმინია და სხვას ვერაფერს დაარქმევს.

მასალაში გამოყენებული მეუფე პეტრეს შეფასება გამოხატულია ჰომოფობიური სიტყვებით, თუმცა მაღალი საჯარო ინტერესიდან გამომდინარე On.ge უცვლელად გთავაზობთ.