ექსპრეზიდენტი მიხეილ სააკაშვილი გამოეხმაურა ქართულ ვებგვერდებზე ჰაკერულ შეტევას, რომლის დროსაც დიფეისზე (მთავარი გვერდი) მისი ფოტო გამოჩნდა.

"მე როგორც ვხედავ, რაღაც კოშმარების დონეზეა უკვე, ხან ჰაკერები მიყენებენ თავისი მიზნებისთვის, საიტების გასატეხად. ეს ყველაფერი არის ვირტუალური სამყარო. ჩვენ ვირტუალური სამყაროდან გავალთ და რეალობაშიც საქართველოს დავაყენებთ განვითარების გზაზე", — განაცხადა სააკაშვილმა თავისი წიგნის პრეზენტაციაზე სკაიპით ჩართვისას.

გუშინ, 28 ოქტომბერს ათასობით ქართული ვებგვერდი დაჰაკეს. მათ შორის იყო სამთავრობო, კერძო კომპანიების, არასამთავრობო ორგანიზაციებისა და მედიების ვებგვერდები. საიტის გახსნისას ჩნდებოდა სააკააშვილის ფოტო წარწერით: I ll be back (მე დავბრუნდები).

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 284-ე მუხლით დაიწყო, რაც კომპიუტერულ სისტემაში უნებართვო შეღწევას გულისხმობს.

პროსერვისის ინფორმაციით, რომლის სერვერებსაც დაესხნენ თავს ჰაკერები, 15 ათასი ვებგვერდი გაითიშა და კიბერთავდასხმა ბოლომდე მოგერიებული არ არის.