შინაგან საქმეთა მინისტრის, ვახტანგ გომელაურის თქმით, მუმლაძის მკვლელობის საქმეზე უწყებიდან არავინ არ გაუთავისუფლებიათ. ამის შესახებ მინისტრმა ზუგდიდში, საგანგებო სამსახურის ახალი შენობის გახსნისას, სჟურნალისტების კითხვაზე პასუხად თქვა. მინისტრის კომენტარს ადგილიდან რადიო თავისუფლება ავრცელებს:

"არ არიან გათავისუფლებული ან რატომ უნდა იყვნენ, თქვენ მიპასუხეთ. მე ვარ უშუალო ხელმძღვანელი და უნდა გადავდგე? მე მყავს 43 ათასი თანამშრომელი და ყველა გადაცდომაზე მინისტრები რომ გადადგნენ, შეიძლება ყოველთვე მოუწიოთ მინისტრებს გადადგომა. ეს ნორმალური იქნება?".

7 ოქტომბერს რუსთავში 35 წლის კაცის განზრახ მკვლელობის საქმეზე 5 პირი, მათ შორის პოლიციის თანამშრომლები დააკავეს. უწყების ცნობით, დაკავებულებს შორის ორი შსს-ს რუსთავის საქალაქო სამმართველოს თანამშრომელი, ხოლო ერთი ყოფილი სამართალდამცველია.

გამოძიების ცნობით, ერთ-ერთმა ბრალდებულმა გარდაცვლილი კუთვნილ მანქანაში ჩაისვა და ვითომ შემთხვევით, მანქანით მოძრაობის დროს პოლიციის ფორმაში მყოფ სამ პირს შეხვდნენ. მათივე ინფორმაციით, მათ მოკლულს უკანონოდ აღუკვეთეს თავისუფლება, ჩაიყვანეს რუსთავში და გადასცეს ამ საქმეზე ბრალდებულ სხვა ორ პირს.