"ძალიან დიდი იმედი მაქვს, რომ ამას სისტემური ხასიათი არ აქვს და მას გარკვეულ შემთხვევაში, შეიძლება, უბრალოდ იმედგაცრუება ჰქონდა", — ამის შესახებ პარლამენტში ქართული ოცნების დეპუტატმა, ნინო წილოსანმა ყოფილი პროკურორის, სალომე ადეიშვილის ფეისბუქპოსტთან დაკავშირებით თქვა. ადეიშვილი პოსტში პროკურატურაში არსებულ პრობლემებზე, მათ შორის სექსუალურ შევიწროებაზე, უკანონობასა და ზეწოლაზე საუბრობს.

წილოსანის თქმით, ის, როგორც ქალი პარლამენტარი, თავს ვალდებულად თვლის, რომ ასეთი საკითხებით დაინტერესდეს.

"საკმაოდ ხატოვნად და ემოციურად ჰქონდა ამ ქალს აღწერილი ის პრობლემები, რასაც აწყდება ის უწყებაში. მე დავინტერესდი და აუცილებლად გამოვითხოვ ინფორმაციას მასთან დაკავშირებით და ძალიან გულდასაწყვეტი იქნება, თუ ეს ინფორმაცია დადასტურდება", — განაცხადა წილოსანმა.

ყოფილმა პროკურორმა, სალომე ადეიშვილმა სამსახურის დატოვების შესახებ ინფორმაცია გუშინ, 22 ოქტომბერს გაავრცელა. ვრცელ პოსტში მან პროკურატურაში არსებულ ვითარებაზე დაწერა.