უზენაესი სასამართლოს მოსამართლეობის კანდიდატმა, პაატა სილაგაძემ პარლამენტში გასაუბრებისას არ უპასუხა დეპუტატ ეკა ბესელიას კითხვას, რომლის შვილი საქმეც განიხილა. სილაგაძემ ეს განცხადება იქამდე გააკეთა, ვიდრე ბესელია კითხვას დასვამდა.

სილაგაძის თქმით, როდესაც პარლამენტს 10-კაციანი სია გადაეგზავნა, მაშინ ბესელიამ თქვა, რომ უვადოდ არ უნდა დაინიშნოს მოსამართლე, რომელმაც მისი შვილის გასამართლებაში მიიღო მონაწილეობა. სილაგაძის თქმით, გარდა ამისა, ბესელია სატელევიზიო ეთერებით აზრს გამოთქვამს და ამბობს, რომ სილაგაძე უარყოფითი პიროვნებაა, რაც მოსამართლის განცხადებით, ბადებს ეჭვს, რომ ბესელია ობიექტური არ არის. აქედან გამომდინარე, სილაგაძე ამბობს, რომ ბესელიას კითხვებს არ უპასუხებს.

ბესელიამ სილაგაძეს უთხრა, რომ მას არ ეგონა თუ მოსამართლე მისით ასე შეშინდებოდა.

"მე შვიდი წელი ვიყავი ხელისუფლებაში და შურისძიება რომ მდომობა თქვენი ან იმ ადამიანების მიმართ, ვინც სისხლგაყინულებმა, უხორცოდ და უსულგულოდ გაასამართლეთ სკოლის მოსწავლე, პატარა ბიჭი არარსებული დანაშაულისთვის იმიტომ, რომ მე ვერაფერი მომიხერხეთ..." — თქვა ბესელიამ, ამის შემდეგ კი სილაგაძემ მას შეაწყვეტინა და უთხრა, რომ მან მტკიცებულებებით ისარგებლა და დღესაც იგივე გადაწყვეტილებას მოაწერდა ხელს.

ბესელიამ სილაგაძეს მოუწოდა, დამშვიდებულიყო და აზრის გამოთქმის საშუალება მიეცა. მოგვიანებით კი მას არაკომპეტენტური უწოდა და უთხრა, რომ მისი კვალიფიკაცია უდაბლესია.