ნეტფლიქსმა სერიალ The Crown-ის მესამე სეზონის პირველი ტრეილერი გამოაქვეყნა, მასში ვხედავთ ოსკაროსან მსახიობ ოლივია კოლმანს დედოფალ ელიზაბეტ მეორეს როლში.

სერიალის მესამე სეზონი ნეტფლიქაზე 17 ნოემბერს გამოვა.

ტრეილერიდან ვიგებთ, რომ ახალ სეზონში პრინცი ჩარლზი ცდილობს სამეფო ოჯახში თავისი როლი გააძლიეროს. "ამ ოჯახში ვინმე მისმენს? ვინმე აღიარებს ჩემს როლს? — არა!" — ეუბნება ის დედას. პარალელურად, ელიზაბეტის და, პრინცესა მარგარეტი, რომლის როლსაც ჰელენა ბონემ-კარტერი ასრულებს, დედოფლის ფარულ მოქიშპედ გვევლინება.

ამის პარალელურად, დედოფალ ელიზაბეტს დამწყები პოლიტიკოსი და პრემიერმინისტრი ჰაროლდ ვილსონი ეუბნება, რომ ქვეყანა კოტრდება, ეროვნული უსაფრთხოება კი საფრთხის ქვეშაა. ელიზაბეტი მიიჩნევს, რომ კრიზისი მისი მონარქად არჩევის შემდეგ დაიწყო.

სერიალის მეოთხე სეზონი, რომელიც ნეტფლიქსმა უკვე დააანონსა, ფოკუსირებული იქნება პრინცესა დაიანასა და მარგარეტ ტეტჩერზე.