აშშ-ს თავდაცვის მინისტრის, მარკ ესპერის განცხადებით, სირიიდან გაყვანილი ამერიკელი სამხედროები ერაყში გადავლენ და იქ ისლამურ სახელმწიფოს შეებრძოლებიან. საუბარია ათას სამხედროზე. მანამდე პრეზიდენტი დონალდ ტრამპი ამბობდა, რომ ისინი სახლში დაბრუნდებოდნენ.

ამასთანავე, სირიის დემოკრატიული ძალები აცხადებენ, რომ მათმა მებრძოლებმა სირიის სასაზღვრო ქალაქი რას-ელ-აინი დატოვეს.

9 ოქტომბერს თურქეთმა სირიაში, სასაზღვრო ტერიტორიაზე სამხედრო მოქმედებები სირიელი ქურთების წინააღმდეგ დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მის მიზნად ქურთებისგან ტერიტორიის გათავისუფლებას ასახელებს.

ტერიტორიას, რომელზეც თურქეთს "უსაფრთხო ზონის" შექმნა სურს, სირიის დემოკრატიული ძალები (SDF) აკონტროლებს, რომლის შემადგენლობაში სახალხო თავდაცვის დანაყოფები (YPG) შედის.

სამხედრო ინტერვენცია მას შემდეგ დაიწყეს, რაც აშშ-მ ჯარების გაყვანის შესახებ განაცხადა. გადაწყვეტილება მოულოდნელი იყო, რადგან სირიელი ქურთები ისლამურ სახელმწიფოსთან ბრძოლაში აშშ-ს მთავარი მოკავშირეები იყვნენ.

თურქული ძალებისგან თავდასაცავად ქურთებმა დასახმარებლად სირიის სამთავრობო ძალებსა და რუსეთს მიმართეს. სირიამ თურქეთის სასაზღვრო ტერიტორიაზე ჯარების განთავსება დაიწყო, ხოლო რუსეთი თურქეთისა და სირიის სამხედრო ძალებს შორის პატრულირებს.

16 ოქტომბერს აშშ-ს კონგრესის წარმომადგენლობითმა პალატამ მხარი დაუჭირა რეზოლუციას, რომლითაც სირიიდან ჯარების გამოყვანა დაგმეს. რეზოლუციას მხარი დაუჭირეს არა მხოლოდ დემოკრატებმა, არამედ რესპუბლიკელებმაც.

17 ოქტომბერს ანკარაში საგანგებო შეხვედრა გაიმართა. თურქეთის პრეზიდენტი, რეჯეპ ტაიპ ერდოღანი და აშშ-ს ვიცე-პრეზიდენტი, მაიკ პენსი შეთანხმდნენ, რომ თურქეთი 120 საათით ცეცხლს შეწყვეტდა, რა დროსაც ქურთები სირიის სასაზღვრო რეგიონიდან მებრძოლებსა და ტექნიკას გაიყვანდნენ.

ამავე თემაზე: