სექსუალური ძალდობის საქმეში ბრალდებულის ადვოკატი მარიამ კუბლაშვილი ამბობს, რომ მისი დაცვის ქვეშ მყოფი, ილია ჯიშკარიანი ყოველდღე ერთ ჭიქა კონიაკს სვამს. როგორც ადვოკატმა მთავარი არხის ეთერში თქვა, თბილისის საკრებულოს ქართული ოცნების დეპუტატმა ალკოჰოლი დალია იმ დღესაც, როცა ინციდენტი მოხდა.

კუბლაშვილი ამბობს, რომ ჯიშკარიანს ოთხჯერ აქვს ინფარქტი გადატანილი და მისთვის ერთი ჭიქა კონიაკის დალევა აუცილებელია.

"ერთ ჭიქა კონიაკს იღებდა ყოველდღე. ნაბახუსევზე რომ სჭირდებოდა, ეს ერთ-ერთი დღე იყო. მე ვსაუბრობ იმას, რომ კონიაკს იღებდა საერთოდ", — თქვა კუბლაშვილმა.

კუბლაშვილი დეპუტატის დასაცავად საჯარო გამოსვლებში მუდმივად იმეორებს, რომ დაზარალებულის სტატუსის მქონე, თამთა თოდაძე ალკოჰოლს სვამდა. დღეს, 17 ოქტომბერს კი მთავარი არხის ეთერში ის დამოკიდებულებაშიც დაადანაშაულა, თუმცა დეპუტატის მიერ სამუშაო საათებში დალევა ნაბახუსევობით გაამართლა.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

ილია ჯიშკარიანს პროკურატურამ ბრალი წარუდგინა. თბილისის საქალაქო სასამართლომ 10-ათასლარიანი გირაო შეუფარდა.