შინაგან საქმეთა სამინისტროს განცხადებით, გარდაბანში, ცოლად შერთვის მიზნით, 19 წლის გოგოს მოტაცების გამო ორი პირი დააკავეს. შემთხვევა სოფელ თაზაქენდში მოხდა.

უწყების განცხადებით, გამოძიებით დადგინდა, რომ 1990 წელს დაბადებულმა ბრალდებულმა 1991 წელს დაბადებულ თანამზრახველთან ერთად ცოლად შერთვის მიზნით, თავისუფლება უკანონოდ აღუკვეთა ამავე სოფლის მკვიდრს და ავტომანქანით მარნეულის მიმართულებით წაიყვანა. გოგომ სოფელ ქეშალო 2-ში მისვლისას გაქცევა მოახერხა, ბრალდებულები კი ადგილიდან მიიმალნენ.

შსს-ში განმარტავენ, რომ ორივე ბრალდებული, მოსამართლის განჩინების საფუძველზე, თბილისში დააკავეს. საქმეზე გამოძიება სისხლის სამართლის კოდექსის 143-ე მუხლის მე-3 ნაწილის "ა" ქვეპუნქტით მიმდინარეობს. მუხლი ჯგუფის მიერ წინასწარი შეთანხმებით თავისუფლების უკანონო აღკვეთას გულისხმობს და შვიდიდან ათ წლამდე პატიმრობას ითვალისწინებს.