თურქეთის სამხედროები აცხადებენ, რომ სირიაში მნიშვნელოვანი სასაზღვრო ქალაქი რას-ელ-აინი დაიკავეს. Associated Press-ის ინფორმაციით, 9 ოქტომბერს სირიაში საომარი მოქმედებების დაწყების შემდეგ ეს თურქეთის ყველაზე დიდი მიღწევაა.

თურქეთმა სირიის ტერიტორიაზე სამხედრო მოქმედებები სირიელი ქურთების წინააღმდეგ დაიწყო. თურქეთის ხელისუფლება ამ ოპერაციას "მშვიდობის წყაროს" უწოდებს და მათი მიზანია სირიის საზღვარზე ქურთებისგან და ე.წ. ისლამური სახელმწიფოსგან თავისუფალი ზონა შეიქმნას. როგორც ოფიციალური ანკარა აცხადებს, ამით 1-2 მილიონი სირიელი ლტოლვილი თავის საცხოვრებელს დაუბრუნდება.

სამხედრო თავდასხმაში მონაწილეობს ავიაცია, არტილერია და სხვადასხვა სამხედრო დანაყოფი. თავდასხმა ქურთების მიერ კონტროლირებად ოთხ ძირითად ქალაქზე დაიწყო, რის გამოც ათასობით ადამიანმა საკუთარ საცხოვრებელი დატოვა. დაღუპულებს შორის არიან როგორც ქურთი მებრძოლები, ისე მშვიდობიანი მოსახლეობა.

თავდასხმის გამო საერთაშორისო საზოგადოებამ თურქეთი გააკრიტიკა. აშშ-ს პრეზიდენტმა, დონალდ ტრამპმა განაცხადა, რომ ვაშინგტონი თურქეთის ქმედებებს არ ამართლებს და სერიოზული სანქციების გატარებით იმუქრება. გარდა ამისა, ოპერაციის დაწყებამდე აშშ-მ რეგიონიდან საკუთარი სამხედროები გამოიყვანა.

გაეროს გენერალურმა მდივანმა, ანტიონიო გუტიერეშმა შეშფოთება გამოთქვა მიმდინარე სიტუაციის გამო, ხოლო ფედერიკა მოგერინიმ თურქეთისგან საომარი მოქმედებების შეწყვეტა მოითხოვა.