"მე მიკერძოებულ ჟურნალისტებთან საუბარი არ მსურს", — ასე მიმართა ილია ჯიშკარიანის ადვოკატმა, მარიამ კუბლაშვილმა ფორმულას იმ ჟურნალისტს, რომელიც სექსუალური ძალადობის საქმეზე ნივთმტკიცებების განადგურებაზე სვამდა კითხვებს. ადვოკატი იმ მოტივით, რომ არ იცნობდა საქმის დეტალებს, ცდილობდა რიგ კითხვებზე პასუხი არ გაეცა.

"თქვენ მისვამთ კითხვას... ირონიით საუბრობთ. მე არ ვაპირებ იმ ჟურნალისტებთან საუბარს, რომელიც მოდის იმისთვის რომ რაღაც სიტყვაზე მოახდინოს სპეკულაცია... ვინ გადაიტანა და ვინ დადო პრინტერი მაგიდაზე ეს მოცემულობას არ ცვლის", — თქვა კუბლაშვილმა.

ადვოკატი მარიამ კუბლაშვილი გააღიზიანა ტაბულას ჟურნალისტის კითხვებმაც. ინტერვიუს ჩაწერის დროს ჟურნალისტმა ადვოკატს ჰკითხა, ის, რომ ზოგიერთ კითხვაზე პასუხს არ სცემს, ხომ არ ბადებდა ეს ეჭვს, რომ არ სურდა პასუხი გაეცა. ამის შემდეგ ადვოკატმა ჟურნალისტს "არაპროფესიონალი" და "ცინიკოსი" უწოდა.

დღეს, 11 სექტემბერს სექსუალურ ძალადობაში დადანაშაულებულ ილია ჯიშკარიანს სასამართლომ 10 ათასი ლარის ოდენობის გირაო შეუფარდა. მასვე საქმეზე დაკითხულ მოწმეებთან ნებართვის გარეშე კომუნიკაცია და დაზარალებულ თამთა თოდაძესთან მიახლოება აეკრძალა.

სექსუალური ძალადობის საქმე

ძალადობის სავარაუდო მსხვერპლი ყვება, რომ ჯიშკარიანმა მასზე სექსუალური ძალადობა სცადა და როცა გაქცევა მოახერხა, შემდეგ ფიზიკურად იძალადა. შინაგან საქმეთა სამინისტრომ საქმეზე გამოძიება სამი მუხლით დაიწყო.

გარდა ამისა, თამთა თოდაძე ამბობს, რომ პოლიცია სავარაუდო დანაშაულის ადგილზე რამდენიმესაათიანი დაგვიანებით მივიდა. მისი თქმით, სავარაუდო დანაშაული დღის ოთხ საათზე მოხდა, ხოლო სამართალდამცავები ადგილზე მხოლოდ ღამის სამ საათზე მივიდნენ და ოთახი უკვე დალაგებული დახვდათ.

თამთა თოდაძის დედა აცხადებს, რომ ილია ჯიშკარიანის მეგობარი მასთან მივიდა და მორიგება შესთავაზა. როგორც მან ჟურნალისტებს უთხრა, მორიგების პირობა მან არ იცის, თუმცა საკითხი ბრალდების უარყოფას ეხებოდა.

თოდაძის თქმთ, ჯიშკარიანმა მასზე 30 სექტემბერს იძალადა, თუმცა ამ დრომდე მას დაზარალებული სტატუსი არ ჰქონდა მინიჭებული. ამის მიზეზად პროკურატურა ექსპერტიზის დასკვნის არარსებობას ასახელებდა.

6 ოქტომბერს თოდაძემ მთავარი არხის ეთერში მომხდარზე ღიად ისაუბრა, მეორე დღეს კი პროკურატურასთან მისი მხარდამჭერი აქცია გაიამართა. 8 ოქტომბერს მისმა უფლებადამცველმა პროკურატურას დაზარალებულის სტატუსის მისანიჭებლად ისევ მიმართა, საღამოს კი ცნობილი გახდა, რომ პროკურატურამ ილია ჯიშკარიანს ბრალი წარუდგინა და ქალი დაზარალებულად ცნო.