პარლამენტის თავმჯდომარე არჩილ თალაკვაძე ამბობს, რომ პრეზიდენტ გიორგი მარგველაშვილის ყოფილი საპარლამენტო მდივანი და იუსტიციის საბჭოს წევრი, ანა დოლიძე ხელისუფლებისთვის ერთ-ერთი ძლიერი ოპონენტია. ამის შესახებ თალაკვაძემ ჟურნალისტებთან ისაუბრა.

"არ მგონია, ანა დოლიძე იყოს ხელოვნური ოპოზიცია. ის არის ერთ-ერთი ძლიერი ოპონენტი ხელისუფლებისთვის. ეს გამოჩნდა იუსტიციის საბჭოში მისი მუშაობის შედეგად. მისი საზოგადოებრივი ცხოვრება და უფლებადაცვითი გამოცდილება აჩვენებს, რომ თუ ის საკმარის მხარდაჭერას მოიპოვებს და შევა პარლამენტში, ის იქნება საკმაოდ ძლიერი ოპონენტი", — განაცხადა თალაკვაძემ.

ანა დოლიძემ 10 ოქტომბერს გადაცემა მთავარ არხთან განაცხადა, რომ სახალხო წევრობაზე დაფუძნებულ ორგანიზაციას ქმნის და გუნდს კრებს. მისი თქმით, მოლაპარაკებები მიმდინარეობს ქართული ოცნების ყოფილ დეპუტატ ლევან კობერიძესთანაც. სხვა პირებს ის არ ასახელებს.

დოლიძე განმარტავს, რომ ის რომელიმე კონკრეტულ პარტიასთან თანამშრომლობას არ გულისხმობს, რადგან არ მოსწონს პიროვნებების კულტი საქართველოში. მაგალითად მას ნაციონალურ მოძრაობაში მიხეილ სააკაშვილის როლი მოჰყავს. დოლიძე არ პასუხობდა კითხვას, იქნება თუ არა ეს ორგანიზაცია პოლიტიკური პარტია.