სასამართლომ არ დააკმაყოფილა ნაციონალური მოძრაობის დეპუტატის, ნიკა მელიას შუამდგომლობა ელექტრონული სამაჯურის მოხსნაზე. მელიას ადვოკატის განცხადებით, მოსამართლემ გადაწყვეტილება ემოციურ ფონზე მიიღო, რადგან მანამდე მელია თავადვე გააძევა დარბაზიდან.

"მოსამართლე დღეს მთლიანად დაეყრდნო იმ გარემოებას, რომ მელია არ დაემორჩილა მის მოწოდებას. მთავარი არგუმენტი რაც მოვისმინე არის ის, რომ მელია მე გავაძევე და შესაბამისად, ამის გამო არ ვიღებ გადაწყვეტილებას მისი აღკვეთის ღონისძიების გაუქმებაზეო. ერთადერთი, რაც გავიგე ეს იყო. ფაქტობრივად, რაღაც პირადი წყენის ნიშნებია", — განაცხადა მან.

"ჩაქუჩი დაურტყით მურუსიძეს, ჩინჩალაძეს და თადუმაძეს", — ასე მიმართა დეპუტატმა მოსამართლე გიორგი კერატიშვილს სხდომაზე რის შემდეგაც ის დარბაზიდან გააძევეს. გაძევების შემდეგ ის ტელეკომპანი პირველში პროკურატურასთან შეუთანხმებლად წავიდა. უწყების განცხადებით, საკითხს შეისწავლიან და მოახდენენ შესაბამის სამართლებრივ რეაგირებას.

დეპუტატმა ეს შეზღუდვა 10 სექტემბერსაც დაარღვია, როდესაც საგამოძიებო ორგანოს უარის მიუხედავად, საცხოვრებელი ადგილი დატოვა და ტელეკომპანია კავკასიაში წავიდა. მაშინ უწყებამ მას განუმარტა, რომ აღნიშნული ქმედება წარმოადგენს აღკვეთის ღონისძიების გამოყენების პირობის დარღვევას და განმეორების შემთხვევაში, მის მიმართ, შესაძლოა, უფრო მკაცრი აღკვეთის ღონისძიება გამოიყენონ.

ნიკა მელიას 20 ივნისის საქმეზე აღკვეთის ღონისძიებად გირაო შეეფარდა და სახლიდან გასვლისთვის პროკურატურის ნებართვა სჭირდება. მას ბრალი აქციის მიმდინარეობისას ჯგუფური ძალადობის ხელმძღვანელობის და მასში მონაწილეობისთვის სისხლის სამართლის კოდექსის 225-ე მუხლის პირველი და მეორე ნაწილებით წაუყენეს.