ჯიპას ლექტორმა ნიკა ხოფერიამ სტუდენტებს სიურპრიზი მოუწყო და ლექციაზე რომაელი მეომრის აღჭურვილობით გამოჩნდა.

ხოფერია სტუდენტებს საქართველოს ისტორიის საგანს ასწავლის. როგორც ლექტორი ფეისბუქზე წერს, რომის ისტორია ბავშვობიდან მისი ერთ-ერთი საყვარელი თემაა:

"მივადექით პომპეუსის იბერიულ ლაშქრობას და შესაბამისად, დიდი რომაული ამბებიც გვქონდა დღევანდელ ლექციაზე, რომელიც რომაელების აღმოსავლეთში გამოჩენის და მათი კავკასიის ხალხებთან ურთიერთობების თემას შეეხებოდა".

მისი თქმით, ლექციაზე წარმოდგენილი ჰქონდა I-II საუკუნეების რომაული აღჭურვილობის მთავარი ნაწილები, მრავალფეროვანი სლაიდები და სცენები რომაელებზე გადაღებული რამდენიმე ფილმიდან. ლექციის ბოლოს კი მან სტუდენტებთან ერთად რომაული სამაგიდო თამაში Latrunculi ითამაშა.

ლექტორის სიტყვებით, გახარებულია, რომ მისი ინიციატივა სტუდენტებს მოეწონათ.