Breaking Bad-ის ფინალურ სერიაში ყველამ ვნახეთ, რომ ვოლტერ ვაითი მის მიერ შექმნილი ავტომატური მსროლელის ტყვიით დაიჭრა და სერიამაც მიგვანიშნა, რომ პერსონაჟი ამ ჭრილობის შემდეგ მოკვდა. თუმცა, ფანების ნაწილი ექვსი წელი ინარჩუნებდა რწმენას, რომ ვოლტი ამ სიტუაციაშიც შეიძლებოდა გადარჩენილიყო.

მას შემდეგ, რაც სერიალის სიქველი ფილმი, El Camino დაანონსდა, არაპოპულარული თეორია ხელმეორედ ამოტივტივდა. ფანების ამ ნაწილისთვის სამწუხაროდ, სერიალის შემქმნელმა ვოლტის გადარჩენასთან დაკავშირებული ყველა ეჭვი გაფანტა.

ფოტო: AMC

ვოლტერ ვაითის ბედზე ვინს გილიგანმა რიჩ აისანთან ინტერვიუში ისაუბრა:

"ამაზე გიპასუხებ რიჩ, რადგან ძალიან მიყვარხარ. კი, ვოლტერ ვაითი ნამდვილად მკვდარია".

გილიგანს ასევე ჰკითხეს, ვიხილავდით თუ არა ბრაიან კრენსტონს ფილმში, El Camino, თუნდაც ვოლტის ფლეშბექების სახით, თუმცა ამ კითხვაზე პასუხი ეპოქალური სერიალის შემქმნელმა ყველა შესაძლო გზით აირიდა.

ელ კამინო ნეტფლიქსზე 11 ოქტომბერს გამოდის, მანამდე კი შეგიძლიათ იხილოთ სერიალის მსახიობები ფილმის პრემიერაზე.