შვედეთის მეფემ, კარლ XVI გუსტავმა თავის ხუთ შვილიშვილს სამეფო სტატუსი ჩამოართვა და სამეფო ოჯახიდან გარიცხა. გადაწყვეტილება არ ეხება მემკვიდრე პრინცესა ვიქტორიას შვილებს, რომლებიც ტახტის მემკვიდრეთა პირდაპირ სიაში არიან.

მეფის გადაწყვეტილებით, შვილიშვილები აღარ იქნებიან ვალდებული, სამეფო ვალდებულებები შეასრულონ და არც სახელმწიფოს ბიუჯეტიდან დაფინანსდებიან. ამავე დროს, ისინი ჰერცოგისა და ჰერცოგინიას ტიტულებს შეინარჩუნებენ.

კარლ XVI გუსტავს და დედოფალ სილვიას სამი შვილი ჰყავთ. სამეფო სტატუსი ჩამოერთმევათ პრინც კარლ ფილიპის ორ შვილსა და პრინცესა მადლენის სამ შვილს. ორივე მათგანი მამის გადაწყვეტილებას მიესალმება. მათივე თქმით, მათ შვილებს უფრო მეტი გადაწყვეტილებისა და თავისუფალი ცხოვრების საშუალება ექნებათ.

შვედეთი ევროპაში ერთ-ერთი ქვეყანაა, სადაც ამ დრომდე მონარქიაა შენარჩუნებული. 1980 წელს შვედეთის სამეფომ მემკვიდრეობის წესი შეცვალა, რათა უფროს მემკვიდრეს ტახტი სქესის მიუხედავად დაეკავებინა.