20 ივნისს დაკავებული ბესიკ თამლიანის დედა შიმშილობას იწყებს. მისი თქმით, ქვეყანაში დემოკრატია და სამართალი არ არის და ამის დამტკიცებას შეეწირება.

"მსოფლიო დაინახავს და მომავალი თაობისთვის იქნებ რამე გამოსავალი გამოინახოს, თორემ ამ მთავრობის იმედი არანაირად არა მაქვს", — განუცხადა მან ფორმულა ნიუსს.

რუსუდან თამლიანი რუსთაველზე კარავში დარჩება, სადაც აქამდე ხელმოწერებს აგროვებდნენ დაკავებულების გათავისუფლების მოთხოვნით. ფორმულა ნიუსის ინფორმაციით, შიმშილობს მისი შვილიც.

20 ივნისის საქმეზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, პასუხისგებაში მიცემულია 20-მდე პირი, მათ შორის პარლამენტის წევრი, ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში. ასევე, პოლიტიკოსი, ირაკლი ოქრუაშვილი.