პარლამენტის თავმჯდომარე არჩილ თალაკვაძე აცხადებს, რომ მანდატის დატოვების საკითხზე ვანო ზარდიაშვილთან საუბარი ჰქონდა. დამატებით დეტალებს ის არ აჟღერებს და ამბობს, რომ უფრო მეტს საზოგადოება თავად ზარდიაშვილისგან შეიტყობს.

"ბატონმა ვანო ზარდიაშვილმა არაერთხელ განაცხადა, რომ თანამდებობა, დეპუტატის მანდატი არ არის თვითმიზანი და არ არის ის მთავარი ღირებულება, რომლისთვისაც ჩვენი გუნდი მუშაობს. დეპუტატის მანდატიც და სხვა თანამდებობაც არის საშუალება, რომ საქმე გავაკეთოთ. შესაბამისად, ამასთან დაკავშირებით ზედმეტი ყურადღება და აჟიოტაჟი მისთვისაც და ჩვენთვისაც არის მიუღებელი.

რაც შეეხება მის გადაწყვეტილებას, მე მას ვესაუბრე და ვიცი, რა თქმა უდნა, თუ რა გეგმები აქვს მას. ცოტა ხანში თქვენ გეცოდინებათ უფრო მეტი. ალბათ, უპრიანია, რომ ამასთან დაკავშირებით თავად ზარდიაშვილამ ისაუბროს", — განაცხადა მან.

ინფორმაცია ზარდიაშვილის მიერ მანდატის დატოვებაზე გუშინ, 6 ოქტომბერს ტელეკომპანია პირველმა გაავრცელა.

"ამ ეტაპზე არაფერი მაგდაგვარი გადაწყვეტილება არ მიმიღია, დაველოდოთ დროს და ნუ გავუსწრებთ მოვლენებს", — განუცხადა დეპუტატმა ტელეკომპანიას სატელეფონო ინტერვიუში.

ვანო ზარდიაშვილი 2016 წლიდან პარლამენტის დეპუტატია. არასამთავრობო ორგანიზაციები და ოპოზიცია მას ე.წ. სასამართლო კლანის ნაწილად მოიხსენიებს. მისი ყოფილი თანაგუნდელი ეკა ბესელია კი ამტკიცებს, რომ ის მოსამართლეთა პირველი ათკაციანი სიის გატანას ცდილობდა პარლამენტში.

რამდენიმე დღის წინ, 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ბესელიასა და ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია მას ხელით შეეხო.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ კონფლიქტის შემდეგ.

მომხდარში თავის დანაშაულს ვერ ხედავდა ზარდიაშვილიც. ინციდენტის შემდეგ მან მომხდარი სექსისტურად შეაფასა, როცა ტელეკომპანია პირველის წამყვანს ჰკითხა: "როგორც ქალს და როგორც მანდილოსანს, სუსტი სქესის წარმომადგენელს, ობიექტურ ჟურნალისტს, თქვენ მოგეწონათ ბესელიას დღევანდელი საქციელი?"