ევროკავშირის ლიტერატურული პრიზი 2009 წლიდან გაიცემა და მისი მიზანი იმ მწერლების ფართო საზოგადოებისთვის გაცნობაა, რომლებსაც საკუთარი წიგნი უკვე აქვთ გამოქვეყნებული, მაგრამ დიდი აღიარება ჯერ არ მოუპოვებიათ. წლევანდელი დაჯილდოების ერთ-ერთი გამარჯვებული კი ბექა ადამაშვილი გახდა, რომელიც პირველი ქართველი ავტორია, ვისაც ეს პრიზი გადაეცა.

ბექა ადამაშვილმა სადებიუტო რომანი ბესტსელერი 2014 წელს გამოაქვეყნა და მაშინვე მიიპყრო ქართველი მკითხველების ყურადღება თავისი უზომოდ დახვეწილი იუმორითა და ერთმანეთზე უფრო საინტერესო ლიტერატურული ალუზიებით. 2018 წელს გამოქვეყნებული მისი მეორე წიგნიც ამ რომანში ყველა კვდება ასეთივე პოპულარული გახდა მკითხველებში.

წელს კონკურსში 14 ქვეყანა იღებდა მონაწილეობას და თითოეულ მათგანში სპეციალურად შეიქმნა ადგილობრივი ჟიური, რომელმაც კონკრეტული ქვეყნის ერთი რჩეული ავტორი შეარჩია, რომელსაც მთავარი პრიზის მოსაპოვებლად უნდა ებრძოლა. საქართველოდან ასეთი ახალგაზრდა მწერალი, ბექა ადამაშვილი აღმოჩნდა და მისი ბოლო წიგნი ამ რომანში ყველა კვდება გამარჯვებულებს შორის აღმოჩნდა.

ბექა პროფესიით მარკეტერია, რაც მისი წერის სტილსაც განსხვავებულ ხიბლს მატებს. ეს ევროკავშირის ლიტერატურული პრიზის ჟიურისაც არ დარჩენია შეუმჩნეველი:

"მსოფლიო ლიტერატურის სიღრმისეული ცოდნა და იუმორის შესანიშნავი გრძნობა შერწყმულია მარკეტინგისა და რეკლამის უნარებთან, რაც ბექა ადამაშვილის შემოქმედებას განსაკუთრებულად სახალისოს ხდის".

გამარჯვებული ავტორების ნაწარმოებები მალე ითარგმნება და ერთ კრებულად გამოიცემა.