სასექსის ჰერცოგინია მეგან მარკლი ბრიტანული ტაბლოიდის, Mail-ის წინააღმდეგ სამართლებრივ დავას იწყებს. სამეფო ოჯახის წევრების თქმით, მედია გამოცემამ პირადი წერილები უკანონოდ გამოაქვეყნა.

გამოქვეყნებულ განცხადებაში პრინცმა ჰარიმ აღნიშნა, რომ მას და მეგანს შეუვალი პროპაგანდის წინააღმდეგ მოქმედება უწევთ:

"მე დავკარგე დედა და ახლა ვუყურებ, როგორ აქცევენ ჩემს ცოლს მსხვერპლად იგივე გავლენიანი ძალები".

თავად ტაბლოიდის წარმომადგენელი აცხადებს, რომ გამოცემა თავისი სტატიის დაცვას აპირებს. წერილი, რომელიც მათ გამოაქვეყნეს, სასექსის ჰერცოგინიამ მამას, ტომას მარკლს, 2018 წელს, ჰარისთან ქორწინების შემდეგ მისწერა.

ჰარიმ მეგანისადმი მედიის დამოკიდებულება პრინცესა დაიანას მიმართ თავდასხმებს შეადარა და თქვა, რომ მისი უდიდესი ისტორიული შიში მეორებოდა. სარჩელის დაკმაყოფილების შემთხვევაში, ჰარი და მეგანი მიღებულ კომპენსაციას იმ საქველმოქმედო ორგანიზაციებს შესწირავენ, რომლებიც ბულინგის წინააღმდეგ მოქმედებენ.

რა თქვა პრინცმა ჰარიმ

შესაძლოა ეს ქმედება არაა უსაფრთხო, მაგრამ სწორია", — ამბობს ჰარი და დასძენს, რომ ის და მეგანი მედიის დამოუკიდებლობას პატივს სცემენ. სასექსის ჰერცოგი წერილში აცხადებს, რომ ტაბლოიდში გამოქვეყნებულ მისი ცოლის წერილში ტექსტი ისე იყო შეცვლილი, რომ ის უარყოფითად გამოჩენილიყო.

ფოტო: Getty Images

გთავაზობთ ჰარის წერილიდან მნიშვნელოვან ნაწილებს:

სამწუხაროდ, ჩემი ცოლი ბრიტანული ტაბლოიდის ერთ-ერთი ბოლო მსხვერპლია. ესაა უმოწყალო კამპანია პიროვნების წინააღმდეგ, რომელიც არ ცნობს შედეგებს და რომელიც ბოლო წლის განმავლობაში გამძაფრდა, მაშინ როცა ის ორსულად იყო და მაშინაც, როცა ის ჩვენს ახალშობილზე ზრუნავდა.

ასეთ შეუვალ პროპაგანდას ადამიანი ეწირება. განსაკუთრებით მაშინ, როცა ის აშკარად ყალბი და ბოროტი განზრახვისაა. და იმის მიუხედავად, რომ ჩვენ ამ ყველაფერს მამაცი სახით ვეგებებით, ვერ აღვწერ, თუ რამდენად მტკივნეული იყო ის.

ჩვენ საშუალება არ გვქონდა შეგვეჩერებინა უწყვეტი არასწორი ინტერპრეტაციები. ისინი ხან პოზიტიურ ჭრილში აშუქებდნენ მას, ხან პირიქით — ყოველ დღე ქმნიდნენ ახალ ცრუ ამბებს, განსაკუთრებით მაშინ, როდესაც დეკრეტული შვებულების დროს ის საჯაროდ აღარ ჩანდა. თუმცა ის იყო იგივე ქალი, რომელზეც ერთი წლის წინ ვიქორწინე და იგივე ქალი, რომელიც აფრიკის ტურნეზე იხილეთ.

ორმაგი სტანდარტი მედიისთვის ის თამაშია, რომელში მონაწილეობა ჩვენ არასდროს გვსურდა. მე მისი [მეგანის] ტანჯვის მდუმარე მოწმე ვიყავი დიდი ხნის განმავლობაში და ახლა ჩრდილში ყოფნა და არაფრის კეთება ჩემი რწმენის ღალატი იქნება.

ჩემი უდიდესი შიში ისტორიულად მეორდება. ერთხელ უკვე ვნახე, რა დაემართა ჩემს საყვარელ ადამიანს, რომელსაც აღარ ეპყრობოდნენ, როგორც პიროვნებას. მე დავკარგე დედა და ახლა ვუყურებ, როგორ აქცევენ ჩემს ცოლს მსხვერპლად იგივე გავლენიანი ძალები.

მადლობას გიხდით მხარდაჭერისთვის. ჩვენ ამას ვაფასებთ და შესაძლოა ეს არ ჩანს, მაგრამ ის ძალიან გვჭირდება.