ტელეკომპანია ფორმულას გენერალური დირექტორი, ზუკა გუმბარიძე პროკურატურაში დაიბარეს. უწყებაში On.ge-ს განუცხადეს, რომ იგი ინტერმედიას საქმეზეა დაბარებული.

ზუკა გუმბარიძე კომპანია ინტერმედიას დამფუძნებელიცაა. ტელეკომპანია ფორმულაში On.ge-ს განუცხადეს, რომ იგი გენერალურ პროკურატურაში ადვოკატთან ერთად 2 ოქტომბერს, 14 საათზე მივა. ტელეკომპანია ფორმულამ მაუწყებლობა დღეს, პირველ ოქტომბერს დაიწყო.

პროკურატურაში საგამოძიებო მოქმედებები მიმდინარეობს რუსთავი 2-ის კონტრაქტორი სარეკლამო კომპანიის, ინტერ მედია პლიუსის მიერ მიღებული დიდი ოდენობით თანხების ხარჯვის კანონიერების შესასწავლად.

პროკურატურის ინფორმაციით, 2015 წლის საანგარიშო პერიოდში რუსთავი 2-ის მიერ მიღებულმა დეკლარირებულმა ზარალმა 7 377 230 ლარი შეადგინა, ამავე პერიოდში ინტერ მედია პლიუსის დეკლარირებულმა მოგებამ კი 8 690 664 ლარი.

ამ კომპანიის კონტექსტში, 9 აგვისტოს გამართულ ბრიფინგზე პროკურორმა ახსენა ზუკა გუმბარიძე, რომელმაც თანამოაზრეებთან ერთად რუსთავი 2-ის ხალვაშისთვის გადაცემის შემდეგ ახალი არხის გახსნა დააანონსა.