ორგანიზაცია თანასწორობის მოძრაობის ცნობით, ქვიარ ადამიანი, რომელიც მათ დაუკავშირდა აცხადებს, რომ უცნობი ცდილობდა მის საცხოვრებელში შეჭრას, კერძოდ აბრახუნებდა კარებზე, ემუქრებოდა სიცოცხლის მოსპობით და აკეთებდა ჰომოფობიურ განცხადებებს.

შინაგან საქმეთა სამინისტროში On.ge-ს დაუდასტურეს, რომ დაზარალებულმა მიმართა პოლიციას, რის შედეგადაც საქმეზე გამოძიება სისხლის სამართლის კოდექსის 151-ე, მუქარის მუხლით დაიწყო.

"იმის გათვალისწინებით, რომ ბრალდებული არასწრულწლოვანია, მას გაუფორმდა განრიდების ხელშეკრულება. დაევალება ბრაზის მართვის კურსების გავლა, ასევე, თავშესაფარში იმუშავებს უფასოდ გარკვეული საათების განმავლობაში. საქმეში გამოკვეთილია დისკრიმინაციული მოტივი", — ნათქვამია განცხადებაში.

თანასწორობის მოძრაობის ინფორმაციით, აღნიშნულმა პირმა დაზარალებულს საცხოვრებელი სახლის ფანჯარაც ჩაუმტვრია. ყველაფერი სოციალური ქსელებში კიბერ ბულინგით დაიწყო. სახლში შეჭრის მცდელობამდე, აღნიშნული პირი დაზარალებულს სოციალური ქსელით დაუკავშიდა, უწერდა ჰომოფობიურ კომენტარებს საჯაროდ.