გუშინ, 28 სექტემბერს ძლიერი წვიმის გამო ქუთაისი დაიტბორა. საგანგებო სიტუაციების მართვის სამსახურის ინფორმაციით, რამდენიმე ქუჩაზე სანიაღვრე სისტემამ წყლის ნაკადი ვერ გაატარა. მათივე თქმით, ამოტუმბვა მთელი ღამე გრძელდებოდა.

დატბორვის ამსახველი ფოტო და ვიდეომასალა სოციალურ ქსელში გავრცელდა.

ფოტო: გიგა მაქარაშვილი / FB

ფოტო: კადრი ვიდეოდან / ვინსტონ სმიტი / FB

უწყების განცხადებით, 290 შეტყობინება მიიღეს, რომელთა უმრავლესობა პირველი სართულებისა და სარდაფების დატბორვას ეხებოდა. ასევე, წყალი შევიდა 3 სამედიცინო დაწესებულებაში — ქუთაისის ცენტრალური საავადმყოფო ჯეო ჰოსპიტალი, წმინდა ნიკოლოზის სახელობის ქირურგიული ცენტრი და დასავლეთ საქართველოს სამედიცინო ცენტრი. მათი თქმით, წყალი ამოტუმბეს და საავადმყოფოს ფუნქციონირებას ხელი არ შეშლია.

როგორც ჟურნალსიტი დათო ლიკლიკაძე ფეისბუქგვერდზე წერს, სტიქიის პარალელურად ქუთაისში რაგბის მატჩი არ შეწყვეტილა და მორაგბეებმა დატბორილ მოედანზე ითამაშეს.

ფოტო: არჩილ გეგენავა

ფოტო: არჩილ გეგენავა

საგანგებო სიტუაციების მართვის სამსახურში ამბობენ, რომ შემთხვევების შედეგად არავინ დაშავებულა და ამ დროისთვის რეგიონში მდგომარეობა გაუმჯობესებულია, გზის მონაკვეთებზე კი მოძრაობა სრულად აღდგენილია.