საზოგადოებრივი მოძრაობა ლელოს დამაარსებელი მამუკა ხაზარაძე სოლიდარობას უცხადებს დეპუტატ ეკა ბესელიას და ამბობს, რომ ქალების მიმართ შანტაჟი უნდა დასრულდეს. ხაზარაძე აკრიტიკებს დეპუტატ ვანო ზარდიაშვილის საქციელსაც. ამის შესახებ მან გადაცემა რეაქციის ეთერში ისაუბრა.

"თუნდაც ის ფაქტი, რაც დღეს მოვისმინეთ, ეს არანაირ კაცურ, არანაირ ქართულ საქციელში არ ეწერება, რაც ჩვენ დღეს მოვისმინეთ პარლამენტიდან. ქალის მიმართ დამოკიდებულებაში არ ეწერება და, საერთოდ, ეს ამ ხელისუფლების ხელწერაა, რომელიც გადმოიღო ძალიან კარგად წინა ხელისუფლებისგან. ეს ნიშნავს, რომ არაფერი არ განადგურებულა და ყველაფერი მათ ხელშია", — განაცხადა ხაზარაძემ.

მისი თქმით, ფარული კადრების გავრცელება არის ადამიანის უფლებების სერიოზული შელახვა და ის კანონის უმკაცრესი ზომით უნდა ისჯებოდეს.

"ყველა ქალს, რომელიც ძალადობის მსხვერპლია. ამ ქვეყანაში უნდა დასრულდეს ქალებზე ძალადობა. არ იგულისხმება მარტო შანტაჟი", — აცხადებს ის.

დღეს, 26 სექტემბერს პარლამენტში, სადაც უზენაესის მოსამართლეობის კანდიდატს უსმენდნენ, ეკა ბესელიასა და ვანო ზარდიაშვილს შორის კონფლიქტი მოხდა. ზარდიაშვილმა მოსამართლეების მოსმენის დროს ახსენა სიტყვები "ბესელიას მორალი", რის გამოც ბესელია ყოფილ თანაგუნდელს ხელით შეეხო.

ბესელია ამბობს, რომ საბოდიშო არაფერი აქვს. ის აფრთხილებს ყველას, რომ მსგავსი ქცევის შემთხვევაში, იგივე პასუხს მიიღებენ.

"ამ არარაობასთან არაფერი საქმე არა მაქვს. მას, რა თქმა უნდა, თავი არ უნდა გაუყადრო ადამიანმა, მაგრამ არც იმას არ ვაპირებ, ის შეურაცხყოფები რაც მესმოდა, უკაცრავად ამ სიტყვისთვის, გავატარო", — განაცხადა ბესელიამ.