ევროსაბჭოს საპარლამენტო ასამბლეის თანამომხსენებლები საქართველოს მთავრობას სთავაზობენ, ახალი საარჩევნო კოდექსის შემუშავევამდე აზრის გამოხატვა ვენეციის კომისიას სთხოვონ. თანამომხსენებლების განცხადება საპარლამენტო ასამბლეის ვებგვერდზე 25 სექტემბერს გავრცელდა, სადაც ისინი დადებითად აფასებენ 2020 წლის საპარლამენტო არჩევნებისთვის სრულად პროპორციულ სისტემაზე გადასვლის რეფორმას.

განცხადების ავტორებმა მოუწოდეს საქართველოს ხელისუფლებას, სრულად და გამჭვირვალედ გამოიძიონ საპრეზიდენტო არჩევნების დროს დაფიქსირებული დარღვევები, მათ შორის, ბრალდებები ძალადობასა და დაშინების შესახებ.

საპარლამენტო უმრავლესობის მიერ მომზადებული პროექტი 2020 წლის საპარლამენტო არჩევნების პროპორციული სისტემით ჩატარებას ითვალისწინებს. კერძოდ, პოლიტიკური სუბიექტის მანდატების რაოდენობის დასადგენად, პარტიის მიერ მიღებული ხმების რაოდენობა 150-ზე გამრავლდება და არჩევნებში მონაწილე ყველა პოლიტიკური ძალის მიერ მიღებული ხმების ჯამზე გაიყოფა. არჩევნები ნულოვანი ბარიერის პირობებში ჩატარდება. ასევე, ახალი პროექტი საარჩევნო ბლოკების მონაწილეობის შესაძლებლობას არ ითვალისწინებს.

გაიგე მეტი: