საქართველოდან გატაცებულმა აზერბაიჯანელმა ჟურნალისტმა, აფგან მუხთარლიმ ბაქოს ციხეში შიმშილობა დაიწყო. ამის შესახებ მუხთარლის ცოლი, ლეილა მუსტაფაევა ფეუსბუქის საკუთარ გვერდზე წერს. ის აცხადებს, რომ აფგანს დიაბეტი აქვს და შიმშილობა მისი სიცოცხლისთვის საშიშია, ასეთ შემთხვევაძი კი ძალიან მაღალია კომის რისკი. აფგან მუხთარლის ცოლი ქმრის სიცოცხლეზე პასუხისმგებლობას საქართველოსა და აზერბაიჯანის ხელისუფლებას აკისრებს.

აზერბაიჯანული სააგენტო APA წერს, რომ პენიტენციური სერვისის სამსახურის ინფორმაციით, აფგან მუხთარლიმ შიმშილობა სამარტოო საკანში გადაყვანის შემდეგ დაიწყო. იგივე გამოცემის ცნობით, მუხთარლის ადვოკატმა განაცხადა, რომ პატიმარს ციხეში სასტიკად ეპყრობიან.

თბილისიდან 2017 წლის 29 მაისს გაუჩინარებული ჟურნალისტი, აფგან მუხთარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხთარლი საზღვრის უკანონო კვეთის გამო დააკავეს.

მუხთარლის დაკავებიდან რამდენიმე კვირაში, აზერბაიჯანის მმართველი გუნდის პარლამენტარმა ელმან ნასიროვმა რადიო თავისუფლებასთან ინტერვიუში თქვა, რომ მუხთარლის დაკავება აზერბაიჯან-საქართველოს სპეცსამსახურების წარმატებული ოპერაცია იყო. საქმეზე გამოძიება საქართველოში ამ დრომდე მიმდინარეობს.

ამავე თემაზე: