"პატარა პარტიებისა და რამდენიმე პოლიტიკოსის კამათზე დიდად არ ვიდარდებდი. რელობა ის არის, რომ საქართველო ევროპასა და დასავლეთს ეკუთვნის", — ამის შესახებ PEN ამერიკის პრეზიდენტმა, თომას მელიამ რუსული პროპაგანდის შესახებ On.ge-ს შეკითხვის პასუხად განაცხადა.

კითხვაზე, რა ინსტრუმენტებს იცნობს პრორუსული პარტიების მიერ გავრცელებული პროპაგანდისტული აზრების წინააღმდეგ გამოსაყენებლად, თომას მელიამ განმარტა, რომ მთავარი გამოწვევა ძლიერი არგუმენტებია:

"რატომ იქნება კარგი საქართველოსთვის, იყოს უკეთ დაკავშირებული ეკონომიკურად, პოლიტიკურად და თავდაცვის მხრივ დასავლურ სახელმწიფოებთან. ვფიქრობ, ქართველების უმრავლესობას ეს სურს, რომ იყვნენ თავისუფალი სამყაროს წევრები, დასავლეთის ნაწილი".

თომას მელიას თქმით, ისეთ ღია საზოგადოებაში, როგორიც საქართველოა, ადამიანებს განსხვავებული აზრები უჩნდებათ ევროინტეგრაციის შესახებ, რაც ბუნებრივია. მისი თქმით, პროპაგანდასთან საბრძოლველად მთავარი იარაღი წიგნიერებისა და ინფორმაციულობის გაზრდაა:

"მეტი საჯარო განათლებით, პოლიტიკური დებატებით, სტატებით, დისკუსიებით მედიაში, ინტეგრაციის პოზიტიური ელემენტების გაანალიზებით, მაგალითების ჩვენებით, რომ არსებობს პერსპექტივა ინდივიდებისთვის და ამავე დროს შეგიძლიათ, დაიცვათ საკუთარი კულტურა. საქართველო უნიკალურია და ბევრ რთულ პერიოდს გაუძლო".

PEN ამერიკის პრეზიდენტი თომას მელია დღეს, 23 სექტემბერს თბილისში სიმპოზიუმს დაესწრო თემაზე, "დემოკრატიული ფასეულობების დაცვა და რუსული პროპაგანდის წინააღმდეგ ბრძოლა".