ქართული ოცნების ყოფილი დეპუტატი, პარლამენტის წევრი ლევან კობერიძე კოლეგებს მოუწოდებს, უზენაესი სასამართლოს მოსამართლეობის ყველა კანდიდატი ჩააგდონ. ამის შესახებ მან იურიდიულ საკითხთა კომიტეტის სხდომაზე განაცხადა.

"ეს არის სააკაშვილ-ადეიშვილის სასამართლოს გადმობარება და შემდგომ, პროცესების მართვისთვის გამოყენება... ის რამდენიმე მოსამართლე, რომელიც მე ვიცი, რომ არიან კვალიფიციურები და კეთილსინდისიერები, რეალურად არიან ძალიან ცუდი პროცესის თანამონაწილეები... ამ პროცესის დასრულების შემდეგ "ჩაბეტონდება" კლანი და უკვე პარლამენტის მიერ იქნება ხელდასმული", — ამბობს კობერიძე.

დღეს, 23 სექტემბერს პარლამენტში უზენაესი სასამართლოს მოსამართლეობის კანდიდატების მოსმენა დაიწყო. პარლამენტში შექმნილია სამუშაო ჯგუფი, რომლის ფარგლებში გაიმართება შეხვედრა თითოეულ კანდიდატთან. ამ ეტაპზე მოსამართლეებს იურიდიულ საკითხთა კომიტეტის სხდომაზე უსმენენ.

20-კაციანი სია იუსტიციის უმაღლესმა საბჭომ 4 სექტემბერს დაამტკიცა. სიაში აღმოჩნდა ის ხუთი "სადავო" მოსამართლე, რომელიც პარლამენტში დეკემბერში წარდგენილ 10-კაციან სიაში იყო, მათ შორის, გიორგი მიქაუტაძე, ნინო ქადაგიძე, პაატა სილაგაძე, მერაბ გაბინაშვილი, თამარ ალანია. წინა სია მმართველ პარტიაში განხეთქილების, არასამთავრობოებში კი პროტესტის მიზეზი გახდა.