ნაციონალური მოძრაობის დეპუტატი, რომან გოცირიძე აცხადებს, რომ პრეზიდენტის მიერ შეწყალებაზე დაწესებული მორატორიუმი კონსტიტუციური უფლების არშესრულებასა და მასზე უარის თქმას ნიშნავს.

"მორატორიუმი გაფუჭებულ საქმეს ვერ უშველის. თავისთავად, ნიშნავს კონსტიტუციური უფლების არშესრულებას და მასზე უარის თქმას იმის გამო, რომ, ფაქტობრივად, ამ სისტემაში დანაშაული მოხდა. გარდა ამისა, მის რეპუტაციას მორატორიუმი ვერ უშველის", — აღნიშნა დეპუტატმა.

დღეს,18 სექტემბერს პრეზიდენტმა სალომე ზურაბიშვილმა შეწყალებაზე მორატორიუმი გამოაცხადა. მისივე თქმით, ამ ხნის განმავლობაში ის შეწყალების წესების დახვეწაზე იმუშავებს.

პრეზიდენტი ამბობს, რომ მას აქამდეც ჰქონდა ინიციატივა, პარლამენტში სამუშაო ჯგუფის მიერ შეწყალების წესების დახვეწასთან დაკავშირებით. როგორც ზურაბიშვილი ამბობს, ამაზე მას პარლამენტის თავმჯდომარესთან კონსულტაციები უკვე ჰქონდა.

"ჩვენ იანვრიდან ვამზადებდით ამ ახალ წესებს და ჩვენი ვერსია გადაეცემა პარლამენტის თავმჯდომარეს. მომავალი კვირიდან, ალბათ, შედგება სამუშაო ჯგუფი, სადაც ყველა პარტია შევა და ისინი ჩამოაყალიბებენ როგორი უნდა იყოს ის იდეალური წესები, რათა აღარ მოხდეს საზოგადოების ასეთი შეშფოთება".

პრეზიდენტის მიერ შეწყალების სისტემის გამჭვირვალობასთან დაკავშირებით ბოლო რამდენიმე კვირაში არაერთი კითხვა დაისვა. 17 სექტემბერს ცნობილი გახდა, რომ სალომე ზურაბიშვილმა მარიამობისას მკვლელობაში მსჯავრდებული კიდევ ერთი პირი, ზურაბ ნადირაძე შეიწყალა. მის ექსტრადიციას საქართველოს მთავრობა 23 წლის განმავლობაში ითხოვდა.

მანამდე ინფორმაცია გავრცელდა, რომ ზურაბიშვილმა 18 წლის დათო ოთხმეზურის მკვლელობისთვის გასამართლებული ასლან ბეჟანიძე შეიწყალა. ბეჟანიძე 2016 წლის მარტში დააკავეს და 11 წელი ჰქონდა მისჯილი.

ამასთანავე, პრეზიდენტმა შეიწყალა პირი, რომელიც ბათუმში პოლიციელის, თარაშ მუკბანიანის მკვლელობისთვის იყო მსჯავრდებული. პოლიციელის მკვლელობისთვის რამაზ დევაძეს 2015 წლის 18 სექტემბერს 12 წლით პატიმრობა მიუსაჯეს.

რამდენიმე კვირის წინ თვითონ სალომე ზურაბიშვილმა მაშინ გადაწყვეტილების განმარტებაზე უარი განაცხადა. მისი თქმით, შეწყალება პრეზიდენტის დისკრეციული უფლებაა.

"ეს უცებ გახდა რაღაც სალაპარაკო პრობლემა იმ დროს, როცა აქ ამდენი არის პოზიტივზე სალაპარაკო. ესეც დიდად არ მიკვირს. თუ რამე განცხადება არის უფრო დეტალური გასაკეთებელი, ეს უნდა გაკეთდეს თბილისში", — თქვა ზურაბიშვილმა.

პრეზიდენტის გადაწყვეტილებას კრიტიკით შეხვდნენ როგორც ხელისუფლების, ისე ოპოზიციის წარმომადგენლები. ამასთანავე, მკვლელობისთვის მჯავრდებულთა შეწყალება მიუღებელი აღმოჩნდა მმართველი პარტიის დეპუტატებისთვის. რამდენიმედღიანი კრიტიკის შემდეგ პრეზიდენტი გამოვიდა ინიციატივით, რომ შეწყალების უფლება დაიხვეწოს.

ამავე თემაზე: