კენიაში, სკოლის მოსწავლემ თავი მოიკლა, სავარაუდოდ, სკოლაში მენსტრუაციის გამო შერცხვენის მიზეზით. BBC ადგილობრივ მედიაზე დაყრდნობით წერს, რომ 12 წლის გოგოს დედის თქმით, მისმა ქალიშვილმა თავი მას შემდეგ ჩამოირჩო, რაც მასწავლებელმა დაამცირა.

კენიის ადგილობრივი მედიის ცნობით, სკოლასთან 200 მშობელი შეიკრიბა, რათა მომხდარი გაეპროტესტებინა. პოლიციამ მათ დასაშლელად ცრემლსადენი გაზი გამოიყენა.

2017 წელს კენიამ მიიღო კანონი, რომელიც სკოლის მოსწავლეებს სანიტარული საფენებით უფასოდ ამარაგებდა. ამის მიუხედავად, პარლამენტის კომიტეტი იძიებს, რატომ არ ვრცელდება მიღებული კანონი ყველა სკოლაში.

გოგოს დედა ამბობს, რომ მასწავლებელმა მის შვილს "ჭუჭყიანი" უწოდა, რადგან სკოლის ფორმა დაესვარა და კლასიდან გააგდო.

"მას არ ჰქონდა არაფერი, რომ საფენად გამოეყენებინა. როცა სისხლმა მისი სამოსი დასვარა. უთხრეს, რომ სკოლა დაეტოვებინა და გარეთ დამდგარიყო", — ციტირებს დედის სიტყვებს კენიის მედია.

მისი თქმით, გოგო მოვიდა სახლში და უთხრა დედას მომხდარი, შემდეგ კი თავი მოიკლა. მშობელმა პოლიციას მიმართა, თუმცა იმედგაცრუებული დარჩა სამართალდამცავების უმოქმედობის გამო.

სხვა მშობლებთან ერთად მან სკოლასთან საპროტესტო აქცია გამართა. პოლიციამ 5 მათგანი დააკავა, დასაშლელად კი ცრემლსადენი გაზი გამოიყენა. პროტესტსი გამო სკოლა დაკეტეს.

რეგიონულმა პოლიციამ თქვა, რომ გოგოს თვითმკვლელობის მიზეზებს იძიებენ. სკოლის დირექტორი კომენტარს არ აკეთებს.

კენიაში, ისევე როგორც მის მსგავს სხვა ქვეყნებში, ბევრ გოგოს ხელი არ მიუწვდება ჰიგიენის ნივთებზე, როგორიცაა საფენები და ტამპონი.

გაეროს 2014 წლის ანგარიშით სუბ-საჰარის აფრიკაში 10-დან ერთი გოგო აცდენს სკოლას მენსტრუაციის გამო. შედეგად, კარგავენ განათლების 20%-ს, რის გამოც სკოლიდან რიცხავენ.

ამავე თემაზე: