ქართული ოცნების დეპუტატი, გია ვოლსკი თიბისი ბანკის დამფუძნებლების მიერ მის წინააღმდეგ დაანონსებულ სარჩელს გამოეხმაურა და თქვა, რომ თუ მათ განათლებაში 221 ათასის ჩადება უნდათ, თავად ჩადონ ეს თანხა:

"... ფული არ აქვთ, თუ რა? თუ უნდა რომ მე კრედიტი მომცეს და მერე ეს კრედიტი მის ანგარიშზე შევიტანო და იქიდან დახარჯოს ახალგაზრდების განათლებისთვის. რა უბედურებაა ეს, რა არის? გადაწყვიტა, რომ ამით ყურადღებას მიიქცევს და უფრო გაიძლიერებს პოზიციებს?"

თიბისი ბანკის დამფუძნებელი ბადრი ჯაფარიძე ქართული ოცნების დეპუტატს, გია ვოლსკის "პატივისა და ღირსების შემლახველი განცხადებების" გავრცელებისთვის სასამართლოში უჩივის. ბადრი ჯაფარიძე აპირებს, მიმართოს სასამართლოს სარჩელით და მოითხოვს ვოლსკის განცხადებების საჯარო უარყოფა, ასევე, პირადად გია ვოლსკის დაეკისროს ფინანსური სანქცია 221 952 ლარის ოდენობით, რომელსაც, მისივე თქმით, ახალგაზრდების განათლების დაფინანსებას მოახმარენ.

ბადრი ჯაფარიძის განცხადებით, გია ვოლსკი მისი მისამართით "ცილისწამებას არ იშურებს და ყოვლად აბსურდულ და შეთითხნილ ბრალდებებს რეგულარულად საჯაროდ გამოთქვამს".

"ბატონი ვოლსკი პროკურატურის მიერ დადგმულ ბრალდებასაც არ სჯერდება და მათ საამებლად ახალ "ფაქტებს" იგონებს"", — წერს ჯაფარიძე.

ქართული ოცნების დეპუტატის განცხადება გუშინ 9 სექტემბერს IPN-მა გაავრცელა. მისი თქმით, მამუკა ხაზარაძე და მისი გუნდელები ცდილობენ ისე წარმოაჩინონ სიტუაცია, ვითომ პოლიტიკაში შემოსვლას ლამობენ, პოპულარულები არიან და ერთი სული აქვს სახელმწიფოს გზები მოუჭრას პოლიტიკაში შემოსასვლელად: "ეს არ შეესაბამება სინამდვილეს".

ვოლსკის თქმით, მამუკა ხაზარაძე არის ადამიანი, რომელიც პოლიტიკას იწყებს და იწყებს ტყუილით, "თუნდაც კონსორციუმთან, თუნდაც ანაკლიის პორტთან დაკავშირებით".