ფინანსთა ყოფილი მინისტრი ნოდარ ხადური გარდაიცვალა. პირველი არხი ოჯახის ახლობლებზე დაყრდნობით წერს, რომ გარდაცვალების სავარაუდო მიზეზი გულთან დაკავშირებული ჯანმრთელობის პრობლემები გახდა.

ნოდარ ხადურს ეკონომიკისა და ფინანსების სფეროში ხანგრძლივი კარიერა ჰქონდა. 1996-1997 წლებში ის საქართველოს ეკონომიკის მინისტრის თანაშემწე იყო, 1997-1998 წლებში საქართველოს ფინანსთა მინისტრის მრჩეველი, 1999-2000 წლებში კი საქართველოს ეკონომიკის მინისტრის აპარატის უფროსი.

2003-2004 წლებში ის იკავებდა საქართველოს პარლამენტის გადასახადებისა და შემოსავლების კომიტეტის აპარატის უფროსის, საქართველოს ფინანსთა მინისტრის მოადგილისა და საპარლამენტო მდივნის თანამდებობებს. 2012-2016 წლებში ის საქართველოს ფინანსთა მინისტრი იყო. 2016 წელს კი დაინიშნა კონკურენციის სააგენტოს თავმჯდომარედ.