ქართული ოცნების დეპუტატმა პრემიერობის კანდიდატის, გიორგი გახარიას შექებისას ბიძინა ივანიშვილიც შეაქო. ადამიანის უფლებათა კომიტეტის თავმჯდომარემ პრემიერობის კანდიდატი შეაქო კითხვის დასმისთვის განკუთვნილ დროსაც.

"მე მგონია, რომ ბატონი გიორგი გახარია და მისი კაბინეტი იქნება ეფექტიანი იმ პოლიტიკის განხორციელებაში, რომელიც დაიწყო ბატონმა ბიძინა ივანიშვილმა. პრემიერობის კანდიდატს აქვს სისტემური ძლიერი ხედვა და მან ბევრი სისტემური რეფორმა განახორციელა მეტად საპასუხიმგებლო პოზიციების შესრულების დროს", — თქვა კილაძემ და დასძინა, რომ მინისტრთა კაბინეტის ახალ შემადგენლობას მხარს უჭერს.

გიორგი გახარიას ქებას დაუთმეს უმრავლესობის სხვა დეპუტატებმა მათთვის გამოყოფილი დროის ნაწილიც. მადლობების სერია უმრავლესობაში ადამიანის უფლებათა კომიტეტის თავმჯდომარემ სოფიო კილაძემ გახსნა და გახარიას "სწორი აქცენტებისთვის მადლობა გადაუხადა".

დღეს, 8 სექტემბერს საქართველოს პარლამენტში საბოლოოდ უყრიან კენჭს გახარიას ე.წ. ახალ მთავრობას ძველი სახეებით. სხდომას არ ესწრებიან ევროპული საქართველოს დეპუტატები. ნაციონალური მოძრაობა კი მიუხედავად სხდომაზე დასწრების დაანონსებისა, დარბაზში არ გამოჩენილა.

3 სექტემბერს მინისტრი გიორგი გახარია, რომლის გადადგომასაც საზოგადოების ნაწილი სამ თვეზე მეტია ითხოვს, მმართველმა პარტიამ დააწინაურა და პრემიერ-მინისტრობის კანდიდატად წარადგინა.