საერთაშორისო არქიტექტურული კონკურსში, გუდიაშვილის მოედანზე აბო თბილელის N3/8-სა და N3-ში გაიმარჯვა ატელიერ არქიტეტქსმა - რატი ჩომახიძემ და ვახტანგ კასრელიშვილმა, ხოლო გია აბესაძის ქ. N23/1-ში საუკეთესო პროექტი არქიტექტორთა ჯგუფმა: დავით ავალიშვილმა, ნიკოლოზ მჭედლიძემ და ლევან კალანდარიშვილმა წარმოადგინა.

პროექტების პრეზენტაცია თბილისის მერიისა და თბილისის განვითარების ფონდის ორგანიზებით „ღვინის ქარხანა N1“-ში მოეწყო. გამარჯვებულები თბილისის მერმა დავით ნარმანიამ საპატიო სიგელებით დააჯილდოვა.

მერიის ინფორმაციით, კონკურსის შედეგად ისეთი პროექტები შეიქმნა რომლებიც თავისი ფუნქციით, ფორმებით და მასშტაბით გუდიაშვილის მოედნის განაშენიანების შესატყვისია.

თბილისის მერიის ცნობით, საკონკურსო წინადადების მიხედვით, გია აბესაძის ქუჩა N23/1 - ში მოეწყობა გალერეა, ხოლო აბო თბილელის ქ.3/8-სა და აბო თბილელის ქ.3-ში სასტუმროს, კაფე-ბარის, პარკინგის და მისი ფუნქციონირებისათვის საჭირო სხვადასხვა სივრცეები განთავსდება.

დავით ნარმანიას განცხადებით, პროექტთან დაკავშირებული პროცესები მაქსიმალურად ღიად, გამჭვირვალედ და საზოგადოების ჩართულობით მიმდინარეობს:

"საერთაშორისო კონკურსის გზით შეირჩა წარმოდგენილი პროექტებიდან საუკეთესო, შესაბამისად, ეს საშუალებას მოგვცემს, რომ პროექტები კულტურული მემკვიდრეობის წესების დაცვით განხორციელდეს, რაც მნიშვნელოვანია, ერთის მხრივ, კულტურული ფასეულობების შენარჩუნებისთვის და მეორეს მხრივ, ამ ტერიტორიის მიმზიდველობის გაზრდისთვის, ვინაიდან, ეს ტურისტული თვალსაზრისითაც არის ძალიან საინტერესო".

ღონისძიებაზე, ასევე, კონკურსში მონაწილე 21 არქიტექტურული ნამუშევარიც გამოიფინა. საერთაშორისო არქიტექტურული კონკურსი თბილისის განვითარების ფონდის მიერ 2016 წლის 25 თებერვალს გამოცხადდა.